«Տաշիր» ընկերությունների խմբի փոխնախագահ Նարեկ Կարապետյանը դատական հայց է ներկայացրել ՀՀ հանրային ծառայությունները կարգավորող հանձնաժողովի և դրա նախագահ Մեսրոպ Մեսրոպյանի դեմ՝ պահանջելով անօրինական ճանաչել կարգավորող մարմնի՝ ընկերության դեմ վարչական վարույթ սկսելու որոշումը, հայտնում է datalex.am դատական տեղեկատվական կայքը։
Օգոստոսի 8-ի դատական հայցում Կարապետյանը պահանջում է չեղյալ հայտարարել տարածքային կառավարման և ենթակառուցվածքների նախարարության հուլիսի 15-ի զեկույցի հիման վրա կայացված վարույթ սկսելու որոշումը՝ հղում անելով իրավական հիմքերի բացակայությանը։
Ավելի վաղ ՀԷՑ-ի կողմից թույլ տրված խախտումների վերաբերյալ հաղորդում էր ներկայացվել Հանրային ծառայությունները կարգավորող հանձնաժողովին, Armenia Today-ին հայտնել էին Տարածքային կառավարման և ենթակառուցվածքների նախարարությունից։
ՀՀ հանրային ծառայությունները կարգավորող հանձնաժողովը Ռոմանոս Պետրոսյանին նշանակել էր ՀԷՑ-ի ժամանակավոր կառավարիչ, որոշումը կայացրել էր ՀԾԿՀ նախագահ Մեսրոպ Մեսրոպյանը։
Քննչական կոմիտեն հուլիսի 4-ին Armenia Today-ին տեղեկացրել էր, որ ընկերության գրասենյակում կատարված խուզարկություններից հետո հարուցված գործի շրջանակում կալանավորվածների թիվը հասել է չորսի։ Հուլիսի 8-ին իրավապահները քննչական գործողություններ էին իրականացրել ՀԷՑ-ում և ընկերության տնօրենների խորհրդի նախագահ Նարեկ Կարապետյանի տանը։
ՀՀ Հանրային ծառայությունների կարգավորող հանձնաժողովը մերժել էր «ՀԷՑ» ՓԲԸ-ի ներկայացրած 2018-2034 թվականների ներդրումային ծրագրի 2025 թվականի մասով փոփոխությունները։ ՀՀ նախագահ Վահագն Խաչատուրյանը հուլիսի 8-ին ստորագրել էր ընկերության պետականացմանը, ըստ էության, միտված օրենքները։
