Բագրատ արքեպիսկոպոս Գալստանյանի պաշտպանները միջնորդություն են ներկայացրել քննիչին` իրենց հասանելի դարձած ծավալով նախաքննական գաղտնիքը հրապարակելու թույլտվություն ստանալու համար, տեղեկացրել է փաստաբան Հովհաննես Խուդոյանը։
Ըստ նրա՝ գործի վերաբերյալ կարևոր տեղեկությունները միաժամանակ փոխանցելու են նաև ՀՀ-ում դիվանագիտական ներկայացուցչություններին, քանի որ «արտաքին աշխարհին կեղծ քարոզչական նյութեր ներկայացնելու միտում են տեսնում»։
Նա նշել է, ոչ առաջին անգամ Քննչական կոմիտեն հրապարակել էր մոնտաժված ձայնագրություններ, որոնցում «ակնհայտ խեղաթյուրվում էր բովանդակությունը» (օրինակ` գլխավոր դատախազի` խորհրդարան ներկայացրած նյութերի հետ համեմատելով), սակայն երբ առանց փոփոխությունների նյութը թարգմանել ու տարածել են անգլերենով, հասկացել են, որ գործ ունեն միտումնավոր խեղաթյուրման հետ։
«Երբ քննչական կոմիտեն, ստանալով թերությունների մասին առարկությունները, հաջորդիվ առանց փոփոխությունների սկսեց տարածել մոնտաժված ձայնագրությունների անգլերեն թարգմանությունը, պարզ դարձավ, որ նպատակը ոչ միայն հայ հասարակության մոլորեցումն է, այլև արտաքին աշխարհին կեղծ քարոզչական, բայց ոչ երբեք իրավական նյութի մատուցումն է»,- նշել է փաստաբանը:
Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին Գալստանյանին ու Շիրակի թեմի առաջնորդ Միքայել արքեպիսկոպոս Աջապահյանին, ինչպես նաև ընդդիմադիր «Սրբազան պայքար» շարժման 14 աջակցի։ Աջապահյանը մեղադրվում է իշխանության բռնազավթման հրապարակային կոչեր հնչեցնելու, իսկ Գալստանյանը և «Սրբազան պայքարի» աջակիցները՝ պետական հեղաշրջման փորձ կազմակերպելու մեջ։ Բոլոր կալանավորվածները չեն ընդունում մեղադրանքը:
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
