Ռուսաստանի հայերի միության նախագահ, ռուսաստանաբնակ գործարար Արա Աբրահամյանի հետ ասոցացվող «Սոգլասիե-Արմենիա» փակ բաժնետիրական ընկերությունը մամուլի հաղորդագրություն է տարածել՝ անդրադառնալով Հակակոռուպցիոն դատարանի որոշմանը` դադարեցնել ընկերության սեփականության իրավունքը նախկին «Մանկական աշխարհ» հանրախանութի տարածքում գտնվող չկառուցապատված հողամասի նկատմամբ և անվավեր ճանաչել այդ իրավունքի պետական գրանցումը։
Ընկերությունից ընդգծել են, որ վճիռը դեռևս օրինական ուժի մեջ չի մտել, և որ ընկերությունը պատրաստվում է սահմանված ժամկետում բողոքարկել այն համապատասխան ատյաններում։
Հայտարարության մեջ ընդգծվում է, որ նույն դատավորը՝ նմանատիպ իրավական հարցերի պայմաններում, մերժել է դատախազության հայցը հարակից տարածքի վերաբերյալ, որի «սեփականատերն իշխանամերձ ընկերություն է»։ Թե որ ընկերության մասին է խոսքը, հաղորդագրությունում չի նշվում։
Ընկերությունը համարում է, որ դատական այս որոշումը պայմանավորված է Աբրահամյանի գործունեությամբ, որի հետ ասոցացվում է «Սոգլասիե-Արմենիա»-ն։
Աբրահամյանը հատկապես վերջին ամիսներին հանդես էր եկել ՀՀ վարչապետ Նիկոլ Փաշինյանին քննադատող կոշտ հայտարարություններով։ Նա, մասնավորապես, դատապարտել էր ինչպես «Տաշիր» ընկերությունների խմբի նախագահ, գործարար Սամվել Կարապետյանի, այնպես էլ արքեպիսկոպոսներ Միքայել Աջապահյանի և Բագրատ Գալստանյանի կալանավորումը, ինչպես նաև Փաշինյանի արշավը Վեհափառի դեմ։
Մամուլի հաղորդագրությունում «Սոգլասիե-Արմենիա» ընկերությունը պնդում է, որ հանդիսանալով «օտար ներդրող»՝ կատարել և շարունակում է կատարել անհրաժեշտ շինարարական աշխատանքները, իսկ «դրանց ձգձգումների և խոչընդոտների պատասխանը պետք է փնտրել վարչական մարմինների վարքագծում»։
«Ցավոք, Հակակոռուպցիոն դատարանն ամբողջությամբ անտեսել է վերը նշված օբյեկտիվ հանգամանքները և առանց բավարար իրավական հիմքերի՝ ընտրել է սեփականազրկման կամայական ճանապարհը»,- ասված է հայտարարության մեջ։
Ըստ «Սոգլասիե-Արմենիա»-ի՝ դատարանի հիմնավորումները չեն համապատասխանում ոչ միայն Սահմանադրական և Վճռաբեկ դատարանների պահանջներին, այլև հակասում են Մարդու իրավունքների եվրոպական դատարանի նախադեպային որոշումներին։
