Հայաստանի շախմատի հավաքականի նախկին առաջատար Լևոն Արոնյանը, որն այժմ ներկայացնում է ԱՄՆ-ն, Freestyle Chess Grand Slam Tour Ֆիշերի արագ շախմատի մրցաշարի քառորդ եզրափակչում 2.5:1.5 հաշվով հաղթել է ամերիկացի Հիկարու Նակամուրային, հայտնում է մրցաշարի Ինստագրամի էջը։
Բլիցի երկու պարտիաներում հայ գրոսմայստերը հաղթել է առաջին պարտիան, իսկ երկրորդն ավարտել ոչ-ոքի արդյունքով։
«Լևոնը կրկին դա արեց։ Երեկ աշխարհի առաջին համար Մագնուս Կառլսենին հաղթելուց հետո այսօր նա հաղթեց երկրորդ համարին՝ Նակամուրային։ Այս մարդը առաքելություն ունի»,- ասվում է մրցաշարի էջում։
Կիսաեզրափակչում Արոնյանը կմրցի հնդիկ շախմատիստ Արջուն Էրիգայսիի հետ, ով քառորդ եզրափակչում 1.5:0.5 հաշվով հաղթել է Նոդիրբեկ Աբդուսատորովին։ Եզրափակչի հաղթողը կստանա 200 000 դոլար։
Freestyle Chess Grand Slam Tour Ֆիշերի արագ շախմատի մրցաշարն անցկացվում է հուլիսի 15-19-ը։ Հուլիսի 17-ին Արոնյանը հաղթել էր նորվեգացի շախմատիստ Մագնուս Կառլսենին։
