Ադրբեջանի նախագահ Իլհամ Ալիևը Սիրիայի նախագահի պաշտոնակատար Ահմեդ ալ-Շարաայի հետ հանդիպման ժամանակ հայտարարել է, որ մոտ ապագայում կիրականացվի Թուրքիայի միջոցով Սիրիա ադրբեջանական գազ արտահանելու նախագիծ:
Ադրբեջանական լրատվամիջոցների փոխանցմամբ՝ Բաքվում կայացած հանդիպման ժամանակ Ալիևը նշել է, որ դա կնպաստի Սիրիայի էներգետիկ անվտանգությանը: Նա նաև ասել է, որ Սիրիայի նախորդ իշխանությունները տարիներ շարունակ «անբարյացակամ քաղաքականություն» էին վարում Ադրբեջանի նկատմամբ, և որ երկրում իշխանափոխությունից հետո բացվել են հարաբերությունների զարգացման մեծ հեռանկարներ:
Իր հերթին՝ ալ-Շարաան նշել է, որ Սիրիան հետաքրքրված է Ադրբեջանի հետ համագործակցությամբ քաղաքական, առևտրային, տնտեսական, մշակութային, հումանիտար և այլ ոլորտներում և ընդգծել է Բաքվի ներդրման կարևորությունը Սիրիայի առջև ծառացած էներգետիկ խնդիրների լուծման գործում:
Մայիսին Իսրայելը և Թուրքիան, Բաքվի միջնորդությամբ, սկզբունքային համաձայնության էին եկել՝ ուղղված Սիրիայում իրենց զինվորականների միջև հակամարտությունների կանխարգելմանը:
