Երևանում հուլիսի 4-ի երեկոյան ակցիա է անցկացվել ի պաշտպանություն «Տաշիր» ընկերությունների խմբի նախագահ Սամվել Կարապետյանի, ով հունիսի 18-ից կալանքի տակ է գտնվում իշխանությունը զավթելու կոչի մեղադրանքով:
Գործարարը կալանավորվել էր ի պաշտպանություն եկեղեցու ունեցած ելույթից հետո։ Ակցիայի մասնակիցները հավաքվել են Երևանի կենտրոնում՝ Մաշտոցի պողոտային հարող այգում։
Երթի մեկնարկից առաջ նրանց է դիմել «Տաշիր» ընկերությունների խմբի առաջին փոխնախագահ Նարեկ Կարապետյանը, ով կարևորել է ակցիայի շրջանակներում տարբեր քաղաքական հայացքների տեր մարդկանց, որևէ ուժի չաջակցող քաղաքացիների, տարբեր մասնագիտական խմբերի ներկայացուցիչների համախմբումը:
Կարապետյանի խոսքով՝ Հայաստանում հասարակությունը ներկայումս բաժանված է։ Նա ընդգծել է, որ այդ ամենն արվում է, որպեսզի «մարդկանց հեշտ կառավարեն»։ Նրա խոսքով՝ Սամվել Կարապետյանը կառուցող մարդ է, իսկ «քանդողները Հայաստանում ապագա չունեն, ապագան կառուցողներինն է»:
Ըստ նրա՝ մարդը քանդող է, եթե միայն վատ բաներն է տեսնում, երբ ամբողջ նախորդ տարիների ընթացքում խոսում է միայն ուրիշների թերություններից, մարդկանց ու հասարակության մեջ առկա վատ բաներից, իսկ կառուցողները մարդկանց մեջ միայն լավն են տեսնում։
«Սամվել Կարապետյանը կառուցող մարդ է, տեսնում ու զարգացնում է մարդու լավ կողմերը»,- հավելել է նա։
Իր հերթին՝ գործարարի փաստաբան Արամ Վարդևանյանը Կարապետյանի դեմ հարուցված քրեական գործն «իրավական տեռոր և աբսուրդ» է անվանել: Նա ընդգծել է, որ հարցազրույցը, որը հիմք է հանդիսացել գործի հարուցման համար, իշխանությունը զավթելու կոչ չի պարունակում:
«Ամեն աբսուրդ, որն ունի սկիզբ, ունի նաև վերջ։ Ցանկացած իշխանություն անցողիկ է, իսկ հիշողություն, փաստերը մնայուն են։ Իրավունքը միշտ գերակայում է, արդարությունը միշտ գերակայում է»,- հայտարարել է փաստաբանը։
Այնուհետև ակցիայի մասնակիցները Երևանի կենտրոնական փողոցներով երթով շարժվել են դեպի ԱԱԾ ժամանակավոր պահման մեկուսարան, որտեղ գտնվում է Կարապետյանը: Ցուցարարները վանկարկել են «Պայքար, պայքար՝ մեր ձևով», «Արդարություն, ազատություն՝ մեր ձևով», «Սամվել, Սամվել»։ Նրանք պարզել են Կարապետյանին ազատ արձակելու կոչով պաստառներ։ Երթն ավարտվել է ԱԱԾ շենքի մոտ, որտեղ ոստիկանական մեծ ուժեր էին կենտրոնացած։ Ակցիայի մասնակիցները պահանջել են ազատ արձակել Կարապետյանին։
Փաստաբան Վարդևանյանն ընթերցել է Սամվել Կարապետյանի ուղերձը, որտեղ գործարարը կոչ է արել միավորվել նոր քաղաքական ուժի շուրջ:
Լրագրողների հետ զրույցում Նարեկ Կարապետյանը հայտնել է, որ առաջիկայում կտեղեկացնեն հետագա քայլերի մասին:
«Մեծ ճանապարհի սկիզբն է։ Պետք է ինչ-որ ձև անարդարությանը հավասարակշռել, և մեր ճանապարհը դրա մի քայլն է»,- հայտարարել է նա և հավելել, որ զարմացած են ակցիայի մասնակիցների թվից՝ շնորհակալություն հայտնելով բոլորին աջակցության համար:
Ակցիայից հետո Կարապետյանի պաշտպանական խորհուրդը հայտարարել է, որ երթը բոլորին ապացուցել է, որ հայ ժողովուրդը տեր է իր իրավունքներին և ապագային, իր ավանդույթներին ու սրբություններին։
«Տաշիր» ընկերությունների խմբի առաջին փոխնախագահը հուլիսի 1-ին հայտարարել էր Երևանում երթի մասին՝ երկրում տիրող անարդարության և անօրինականության դեմ բողոքի ակցիայի շրջանակներում:
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Վարչապետ Նիկոլ Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
