Ադրբեջանի նախագահ Իլհամ Ալիևի որդին՝ Հեյդար Ալիևը, Մոսկվայի մարզում գտնվող առանձնատան համար հարկեր չվճարելու պատճառով մոտ մեկ միլիոն ռուբլի է պարտք Ռուսաստանին, գրում են ռուսական լրատվամիջոցները և Տելեգրամ ալիքները:
Նշվում է, որ 27-ամյա Հեյդար Ալիևն էլիտար ամառանոցային «Մայնդորֆի այգիներ» կոչվող թաղամասում ունի 1600 քառակուսի մետր սեփականություն, և շուրջ 35 միլիոն դոլար արժողությամբ (կամ 2,7 միլիարդ ռուբլի- AT) առանձնատան համար Ռուսաստանի դաշնային հարկային ծառայությանը չի վճարել 946 հազար ռուբլի։
Ըստ աղբյուրի՝ Մոսկվայի մարզի հարկային ծառայությունը մի քանի անգամ դիմել է դատարան՝ բռնագանձման որոշում ստանալու համար։ Հաղորդվում է, որ Դատական կատարողների դաշնային ծառայության կայքում Ալիևի ծննդյան ամսաթիվը մեկ օրով սխալ է նշված, ինչի հետևանքով դժվար է լինում գտնել նրա հարկային պարտքերը:
Վերջին մի քանի օրերի ընթացքում ռուս-ադրբեջանական հարաբերությունները վատթարացել են ուժային գերատեսչությունների փոխադարձ գործողությունների ֆոնին։ ՌԴ ՔԿ-ն մեղադրանք էր առաջադրել Եկատերինբուրգում հարձակման ժամանակ ձերբակալված 6 ադրբեջանցիներից 5-ին: Ադրբեջանական դատարանը կալանավորել էր ՌԴ 8 քաղաքացու։ Բաքվում ձերբակալվել են նաև ռուս լրագրողներ, ինչն Ադրբեջանի դեսպանին ՌԴ ԱԳՆ կանչելու պատճառ էր դարձել: Հուլիսի 2-ին Ադրբեջանում Ռուսաստանի դեսպան Միխայիլ Եվդոկիմովը կանչվել էր Ադրբեջանի ԱԳՆ, որտեղ ռուսական կողմին բողոք էր ներկայացվել։
