Ազգային անվտանգության աշխատակիցները Մայր Աթոռ Սուրբ Էջմիածնում են, այս պահին հայտնի չէ, թե ինչ գործողություններ են այնտեղ իրականացվում։ Իրավապահները լրագրողներին թույլ չեն տալիս մուտք գործել Վեհարանի տարածք, թեպետ հոգևարականները նրանց մուտքը թույլատրել էին։
Ժամը 11։50-ի դրությամբ Մայր Աթոռի բակում մեծ թվով ոստիկանական ուժեր են, դիմակավորված ԱԱԾ աշխատակիցներ։ Վեհարանի տարածքում են նաև հոգևորականներ, քաղաքացիներ։
Նշենք, որ այսօր Մայր Աթոռում նախատեսված էր քահանայական ժողով, որի նախագահողը Շիրակի թեմի առաջնորդ Միքայել արքեպիսկոպոս Աջապահյանն էր, ում բնակության հասցեում Քննչական կոմիտեն քննչական և վարութային գործողություններ է իրականացնում։
Լրագրողների փոխանցմամբ՝ ԱԱԾ աշխատակիցները փորձում են Վեհարանի տարածքից բերման ենթարկել Աջապահյանին, իսկ հավաքվածները փորձում են կանխել իրավապահների գործողությունը։
Հայր Ասողիկ Կարապետյանն իր Facebook-ի էջում հայտնել է, որ Հայաստանի ամբողջ հոգևոր դասը Մայր Աթոռում է։
«Սիրելիներ, Հայաստանի ամողջ հոգևոր դասը պատրաստ է կալանավորվելու։ Բոլորս Մայր Աթոռում ենք։ Սուրբ Էջմիածնից կա՛մ մեզ ամենքիս եք տանելու, կա՛մ էլ մեր դիակը»,- գրել է նա։
Թարմացում
12։15
Մայր Աթոռի տարածքում քաշքշոց է, ուժայինները փորձում են Միքայել սրբազանին ուժով դուրս հանել Վեհարանից։ Իրավապահներն ուժ են գործադրում թե՛ հոգևորականների, թե՛ լրագրողների, թե՛ քաղաքացիների նկատմամբ։
12։46
Ազգային ճակատը հայտնել է, որ Միքայել սրբազանի ինքնազգացողությունը վատացել է։
13:00
Հոգևորականները Մայր Աթոռի բակում շարական են երգում, ղողանջում են եկեղեցու զանգերը։
13։15
Հատուկջոկատայիններ են ժամանել Մայր Աթոռ։
14։00
Նաթան սրբազան Հովհաննիսյանը հայտնել է, որ Միքայել սրբազանն ինքնակամ որոշել էր ներկայանալ իրավապահներին, բայց ժողովուրդը նրան երկու անգամ թույլ չի տվել նստել իրավապահների մեքենան։ Նա ընդգծել է, որ Աջապահյանը երբևէ որևէ մեկից չի թաքնվել։
14։18
Վեհարանի դիմաց իրավապահների, քաղաքացիների, այդ թվում՝ հոգևորականների միջև քաշքշոց, բախում սկսվեց։
14։29
ԱԱԾ-ն, որն ավելի վաղ հայտարարել էր Աջապահյանի նկատմամբ հանրային քրեական հետապնդում հարուցելու մասին, ավելի ուշ նշել է, որ որոշել է դուրս գալ Մայր Աթոռի տարածքից՝ «կանխելով իրավիճակի հնարավոր և դիտավորյալ սրումը»։ ԱԱԾ-ն Աջապահյանին կոչ է արել «չթաքնվել իրավապահ մարմիններից և ներկայանալ իրեն սպասող ԱԱԾ օպերատիվ խմբին»։ ՔԿ-ն հավելել է, որ արդարադատության իրականացմանը խոչընդոտելու հատկանիշներով նախաձեռնվել է քրվարույթ։
15։35
Աջապահյանն ավելի ուշ հայտարարել է, որ պատրաստվում է նեկայանալ իրավապահներին, քանի որ որևէ մեկից չի թաքնվում։ Նրա խոսքերից հետո քաղաքացիները շրջապատեցին այն ավտոմեքենան, որով սրբազանը պատրաստվում էր ներկայանալ ուժայիններին։ Քաղաքացիները սկսել են վանկարկել՝ «Դուրս եկեք մեքենայից», շրջափակել ավտոմեքենան։
16։25
Միքայել սրբազանը, որին քաղաքացիները թույլ չտվեցին ավտոմեքենայով ներկայանալ իրավապահներին, որոշել է ոտքով գալ Երևան։ Ճանապարհին քաղաքացիների միջև ծեծկռտուք սկսվեց։
16։57
Միքայել սրբազանը դեպի Քննչական կոմիտե ճանապարհը շարունակեց ավտոմեքենայով, հայտնել է Armenia Today-ի թղթակիցը։
Հունիսի 27-ի առավոտյան փաստաբան Միհրան Պողոսյանը տեղեկացրել էր, որ 30 դիմակավորված անձինք ներխուժել են Շիրակի թեմի առաջնորդարան։ Աջապահյանի նկատմամբ հունիսի 17-ին քրեական վարույթ էր նախաձեռնվել իշխանությունը զավթելուն, սահմանադրական կարգը բռնի տապալելուն ուղղված հրապարակային կոչերի հոդվածով։
Հունիսի 25-ին ԱԱԾ-ն խուզարկություններ էր իրականացրել «Սրբազան պայքար» շարժման աջակիցների բնակարաններում իշխանության զավթման փորձի շուրջ քրեական գործի շրջանակում։ Այն հարուցվել էր Civic.am կայքի հրապարակած փաստաթղթի հիման վրա, որն, ըստ կայքի, «Հեղաշրջման պլան» էր։ ՔԿ-ն հայտնել էր գործողությունների մասին։
Իրավապահներն, ընդհանուր առմամբ, 17 անձի նկատմամբ կալանքի միջնորդություն էին ներկայացրել դատարան։ Նրանցից 15-ի նկատմամբ դատարանը կիրառել էր կալանք՝ երկու ամիս ժամկետով։ Կանալավորվածների թվում է «Սրբազան շարժման» առաջնորդ Բագրատ Գալստանյանը։
