Սերբիայում պետական հեղաշրջում նախապատրաստելու կասկածանքով 6 մարդ է ձերբակալվել, հայտնում է RTS հեռուստաալիքը՝ հղում անելով երկրի ՆԳՆ-ին։
«Ըստ նախնական տվյալների՝ հունիսի 21-ին կասկածյալները հանդիպել են Կրալևո քաղաքի հյուրանոցում՝ հեղաշրջում կազմակերպելու, պետական հաստատությունների ներկայացուցիչների և ոստիկանության աշխատակիցների վրա հարձակումներ նախապատրաստելու, ինչպես նաև հանրապետության կառավարության շենք ներխուժման նպատակով»,- նշվում է հաղորդագրության մեջ։
Ձերբակալվածներից մեկի մոտ հայտնաբերվել է հրացան՝ մաշված սերիական համարով, նա չի ունեցել զենք պահելու թույլտվություն։ Մյուսի մոտ հայտնաբերվել է աղեղնազեն։ Երկուսն էլ կալանավորվել են 48 ժամով։
Սերբիայի նախագահ Ալեքսանդր Վուչիչը հունիսի 24-ին հայտարարել էր, որ զենքի արտահանման դադարեցման պատճառով բողոքի ակցիաների սպառնալիքներ են առաջացել։
2024 թվականի նոյեմբերի 1-ին Նովի Սադ քաղաքի երկաթուղային կայարանում տեղի ունեցած տանիքի փլուզումից հետո, որի հետևանքով զոհվել էր 16 մարդ, Սերբիայում զանգվածային բողոքի ցույցեր էին սկսվել՝ ուսանողների և ընդդիմադիրների մասնակցությամբ։
Սերբիայի իշխանությունները կարծում են, որ ցուցարարների իրական նպատակը կառավարության և նախագահի տապալումն է, իսկ նրանց գործողությունների հետևում կանգնած են Արևմուտքի կողմից ֆինանսավորվող լրատվամիջոցներ և կազմակերպություններ։
Վուչիչի խոսքով՝ տասը տարվա ընթացքում Սերբիայի ներկայիս իշխանությունը տապալելու համար արտասահմանից շուրջ երեք միլիարդ եվրո է ներդրվել։
