ՀՀ դպրոցականները 2 արծաթե և 3 բրոնզե մեդալ են նվաճել աշխարհագրության միջազգային բաց օլիմպիադայում, որն առցանց ձևաչափով առաջին անգամ անցկացրել է ՌԴ Լոմոնոսովի անվան Մոսկվայի պետական համալսարանի աշխարհագրության ֆակուլտետը, հայտնում է ԿԳՄՍՆ-ն:
Հայաստանի 6 ներկայացուցչից բաղկացած թիմը ներկայացրել են «Քվանտ» վարժարանի 5 և Ա․ Շահինյանի անվան ֆիզմաթ հատուկ դպրոցի 1 աշակերտներ: Արծաթե մեդալի են արժանացել Հայկ Անտոնյանը և Սաթի Հայրապետյանը։ Բրոնզե մեդալակիր են դարձել Սամվել Խաչատրյանը, Էրիկա Հարությունյանը և Նարե Պողոսյանը։
Նախարարությունից հայտնում են, որ հայաստանյան թիմը ղեկավարել է աշխարհագրության հանրապետական օլիմպիադայի հանձնաժողովի նախագահ Վարդան Ասատրյանը։
Օլիմպիադան անցկացվել է հունիսի 20-23-ը, որին մասնակցել է 23 երկրի 107 աշակերտ: Թիմերը ձևավորվել են իրենց երկրներում անցկացված աշխարհագրության մրցույթների հիման վրա։ Օլիմպիադան բաղկացած էր երեք փուլից՝ տեսական, գործնական-քարտեզագրման և մուլտիմեդիա-թեստային։
Ապրիլինի հայ դպրոցականները 4 բրոնզե մեդալ էին նվաճել Եվրոպայի աղջիկների մաթեմատիկայի օլիմպիադայում։ Հունիսին ինֆորմատիկայի միջազգային առցանց օլիմպիադայում հայ աշակերտները նվաճել էին 1 արծաթե և 3 բրոնզե մեդալ։
