ԱՄՆ նախագահը Դոնալդ Թրամփը հայտարարել է, որ Ռուսաստանի կողմից Ուկրաինայում օդային մեծ հարձակում սկսելուց հետո դժգոհ է ՌԴ նախագահ Վլադիմիր Պուտինի գործողություններից։
«Ես միշտ լավ հարաբերություններ եմ ունեցել Պուտինի հետ, բայց նրա հետ ինչ-որ բան է պատահել: Նա լրիվ խելքը գցել է։ Անիմաստ սպանում է բազմաթիվ մարդկանց, այդ թվում՝ ոչ միայն զինվորների: Հրթիռներ և անօդաչու սարքեր են արձակվում Ուկրաինայի քաղաքների վրա՝ առանց որևէ պատճառի»,- Truth Social-ում գրել է ԱՄՆ նախագահը։
Թրամփի խոսքով՝ եթե Պուտինը փորձի զավթել ողջ Ուկրաինան, այն կհանգեցնի «Ռուսաստանի կործանմանը»։
ԱՄՆ նախագահը քննադատել է նաև Ուկրաինայի առաջնորդ Վլադիմիր Զելենսկուն՝ ասելով, որ նրա խոսքերը խնդիրներ են առաջացնում։
«Սա պատերազմ է, որը երբեք չէր սկսվի, եթե ես նախագահ լինեի։ Սա Զելենսկու, Պուտինի և Բայդենի (ԱՄՆ նախկին նախագահ – խմբ․) պատերազմն է, ես պարզապես օգնում եմ մարել այն մեծ ու տգեղ հրդեհները, որոնք բռնկվել են ակնհայտ անգործունակության և ատելության պատճառով»,- եզրափակել է Թրամփը։
Կրեմլն արձագանքել է ԱՄՆ նախագահի դժգոհություններին։ Ռուսաստանի առաջնորդի մամուլի քարտուղար Դմիտրի Պեսկովը հայտարարել է, որ Վաշինգտոնը շատ մեծ ջանքեր է գործադրել Մոսկվայի և Կիևի միջև բանակցություններ սկսելու համար, ինչը ենթադրում է «էմոցիոնալ գերբեռնվածություն»։
«Իհարկե, բանակցային գործընթացի սկիզբը, որի համար ամերիկյան կողմը մեծ ջանքեր է գործադրել, շատ կարևոր նվաճում է։ Մենք շնորհակալ ենք ամերիկացիներին և անձամբ նախագահ Թրամփին՝ բանակցային գործընթացը կազմակերպելու և մեկնարկելու գործում նրանց օգնության համար։ Մենք ուշադիր հետևում ենք բոլոր արձագանքներին»,- ասել է նա։
Միևնույն ժամանակ, ըստ Պեսկովի, Պուտինը կայացնում է Ռուսաստանի անվտանգությունն ապահովելու համար անհրաժեշտ որոշումներ։ Նա հավելել է, որ Կիևը «հարձակվում է ՌԴ սոցիալական և խաղաղ ենթակառուցվածքների վրա», իսկ Մոսկվան «պատասխանում է ռազմական թիրախների դեմ հարվածներով»։
