ԱՄՆ նախագահ Դոնալդ Թրամփի վարչակազմն սկսել է Սիրիայի նկատմամբ պատժամիջոցների չեղարկման գործընթացը, ինչը նշանավորում է ԱՄՆ քաղաքականության մեջ մեծ շրջադարձ, տեղեկացնում է CNN-ը։
Ըստ ԱՄՆ ֆինանսների նախարարության՝ Սիրիային տրվել է GL25 ընդհանուր լիցենզիան, որը «թույլ է տալիս իրականացնել Սիրիայի պատժամիջոցների կանոնակարգերով արգելված գործարքներ»։
ԱՄՆ պետքարտուղարությունը նաև 180-օրյա ժամկետով ազատում է տրամադրել «Կեսարի ակտի» համաձայն պատժամիջոցներից՝ Սիրիայի վերակառուցմանն աջակցելու և մարդասիրական իրավիճակը բարելավելու համար։
Թրամփը պատժամիջոցները չեղարկելու որոշումը կայացրել էր Սաուդյան Արաբիայի թագաժառանգ Մուհամմեդ բին Սալմանի և Թուրքիայի նախագահ Ռեջեփ Էրդողանի հետ բանակցություններից հետո։ Սաուդյան Արաբիայի և Թուրքիայի իշխանությունները վաղուց են կողմ արտահայտվում Սիրիայի նկատմամբ պատժամիջոցների մեղմացմանը։
Տարածաշրջանում, սակայն, ԱՄՆ բոլոր դաշնակիցները չէ, որ աջակցել են այդ քայլին, նշում է CNN-ը։ Իսրայելն առարկել է՝ վախենալով անկայունությունից։ Սակայն Թրամփն ասել է. «Ես Իսրայելին չեմ հարցրել։ Ես կարծում եմ, որ դա ճիշտ որոշում է»։
ԵՄ 27 անդամներից բաղկացած խորհուրդը մայիսի 20-ին նաև նախնական համաձայնության է եկել Սիրիայի դեմ բոլոր տնտեսական պատժամիջոցների չեղարկման հարցում։ Այնուամենայնիվ, ԵՄ-ն պատրաստվում է անհատական պատժամիջոցներ կիրառել նրանց նկատմամբ, ովքեր պատասխանատու են էթնիկ ատելություն հրահրելու համար՝ ալավիների և այլ փոքրամասնությունների դեմ վերջերս տեղի ունեցած հարձակումներից հետո։
