Հայաստանը եվրոպացի գործընկերներին կոչ է անում ակտիվացնել աջակցությունն Ադրբեջանի հետ խաղաղության գործընթացին, մայիսի 20-ին Եվրոպական միության Արևելյան Եվրոպայի և Կենտրոնական Ասիայի դեսպանների տարածաշրջանային հավաքի մեկնարկին հայտարարել է ՀՀ արտգործնախարար Արարատ Միրզոյանը:
«Ակնկալում ենք, որ ԵՄ-ում մեր գործընկերները հետևողականորեն ընդգծեն Հայաստանի հետ խաղաղության համաձայնագրի անհապաղ ստորագրման անհրաժեշտությունը՝ թե՛ Բաքվի հետ ուղղակի շփումներում, թե՛ հրապարակային հայտարարություններում և հաղորդակցություններում»,- ասել է նա:
Շեշտելով, որ Երևանի համար խաղաղությունն այլընտրանք չունի, նախարարը, միաժամանակ, կասկածի տակ է դրել համաձայնեցված պայմանագիր ստորագրելու Ադրբեջանի ցանկությունը:
«Թեև դեռևս պարզ չէ՝ արդյոք Ադրբեջանն ունի՞ անկեղծ մտահոգություններ, թե՞ արհեստականորեն ձգձգում է գործընթացը, բայց փաստն այն է, որ երկու երկրների միջև համաձայնեցված խաղաղության պայմանագիրը դեռ չի ստորագրվել։ Եթե մտահոգություններն անկեղծ են, օրինակ՝ սահմանադրական հարցի վերաբերյալ, ապա առանց մանրամասների մեջ խորանալու, կարող եմ հավաստիացնել, որ բոլոր մտահոգությունները հասցեագրելու ամենահստակ և ուղիղ ճանապարհը պայմանագրի ստորագրումն ու դրա վավերացումն է խորհրդարանի կողմից՝ Հայաստանի Սահմանադրական դատարանի դրական եզրակացությունից հետո»,- նշել է արտաքին քաղաքական գերատեսչության ղեկավարը։
Մարտի 13-ին Ադրբեջանի ԱԳ նախարար Ջեյհուն Բայրամովը հայտարարել էր, որ խաղաղության պայմանագրի տեքստի շուրջ բանակցությունների գործընթացն արդեն ավարտված է։ Պաշտոնական Երևանը հաստատել էր նախագծի հաստատման ավարտը, ավելին՝ հայտարարել, որ պատրաստ է սկսել խորհրդակցություններ համաձայնագրի ստորագրման ժամկետների և վայրի շուրջ։
Նախորդ շաբաթ՝ մայիսի 16-ին, Ալբանիայում երկու երկրների առաջնորդների՝ Նիկոլ Փաշինյանի և Իլհամ Ալիևի հանդիպմանը խաղաղության պայմանագրի ստորագրման հարցում առաջընթացի կամ պայմանավորվածության մասին չէր հաղորդվել: Նրանք կարևորել էին պայմանագրի տեքստի համաձայնեցումը, քննարկել ընթացիկ վիճակը:
Ադրբեջանի ղեկավարը մայիսի 20-ին շեշտել է, թե ընդհանուր առմամբ, խաղաղության պայմանագրի տեքստի վերաբերյալ Բաքվի առաջարկած մոտեցումն արդեն ընդունվել է Երևանի կողմից:
