ՀՀ առողջապահության նախարար Անահիտ Ավանեսյանը չի բացառել, որ Հայաստանի բուժհաստատություններում կարող են տնօրեն նշանակվել մարդիկ, որոնք բժշկական կրթություն չունեն։ Կառավարության նիստից հետո նա լրագրողներին տեղեկացրել է, որ այդ նպատակով նախարարությունն առաջիկայում օրենսդրական նախաձեռնությամբ է հանդես գալու։
«Վերանայելու ենք տնօրենների նկատմամբ բժշկական կրթության պարտադիր լինելու հարցը։ Միջազգային փորձի հաջողված պատմություններն էլ են ցույց տալիս, որ բժշկական կենտրոնների կառավարման ֆինանսական, ոչ վիրահատական գործընթացների և մասնագիտական հատվածները պետք է տարանջատել։ Մենք այդպիսով համակարգային փոփոխություն կունենանք ընդհանուր կառավարման մեջ»,- ընդգծել է նախարարը։
Ավանեսյանն, անդրադառնալով Կախվածությունների բուժման ազգային կենտրոնի նախկին տնօրեն Սուրեն Նազինյանի պնդումներին, ըստ որի՝ ինքն «աշխատանքից ազատվել է կեղծ փաստաթուղթ ստորագրելուց հրաժարվելու» պատճառով, դրանք «սուտ» է որակել։
«Ստահոդ պնդումներին ավելացնելու ոչինչ չունեմ»,- ասել է առողջապահական կառույցի գլխավոր պատասխանատուն։
Ապրիլին «Ժողովուրդ» օրաթերթը գրել էր, որ «Նազինյանը հրաժարվել է կեղծ փաստաթուղթ ստորագրել, ինչից հետո Ավանեսյանը նրան ազատել է պաշտոնից»։ Նախարարը չէր բացառել, որ առաջիկայում մի քանի ԲԿ-ներում տնօրենների փոփոխություններ են սպասվում։
Մայիսի 10-ին Նազինյանը «Հետք»-ին հայտնել էր, որ «իրեն փորձել են պարտադրել ստորագրել 87 մլն դրամի խախտման ակտի տակ»։
