Ռուսաստանն Ուկրաինային առաջարկում է մայիսի 15-ին Ստամբուլում վերսկսել 2022 թվականին ընդհատված ուղիղ բանակցությունները՝ առանց նախապայմանների, Interfax-ի փոխանցամբ՝ հայտարարել է ՌԴ նախագահ Վլադիմիր Պուտինը։
«Առաջարկում ենք Կիևի իշխանություններին վերսկսել բանակցությունները, որոնք ընդհատվել էին իրենց կողմից։ Առաջարկում ենք սկսել առանց հապաղելու»,- ասել է Պուտինը։
Նա նշել է, որ թուրքական իշխանությունները բազմիցս առաջարկել են նման բանակցություններ անցկացնել իրենց տարածքում։
«Մեր առաջարկները, ինչպես ասում են, սեղանին են։ Որոշումն այժմ ուկրաինական իշխանությունների և նրանց կուրատորների խնդիրն է, որոնք, կարծես, առաջնորդվում են ոչ թե իրենց ժողովուրդների շահերով, այլ անձնական քաղաքական հավակնություններով և ցանկանում են շարունակել պատերազմը»,- հավելել է Ռուսաստանի ղեկավարը։
Մայիսի 10-ին ՌԴ նախագահի մամուլի քարտուղար Դմիտրի Պեսկովը հայտնել էր, որ Ռուսաստանը կմտածի 30-օրյա հրադադարի առաջարկի մասին։
