Միավորված Ազգերի Կրթության, Գիտության և Մշակույթի Կազմակերպությունը (ՅՈՒՆԵՍԿՕ) 12-րդ դարի հայ մեծ մտածող, օրենսդիր, առակագիր Մխիթար Գոշի «Գիրք Դատաստանի» («Դատաստանագիրք Հայոց») աշխատությունը ներառել է «Աշխարհի հիշողություն» միջազգային ռեգիստրում (Memory of the World Register), հայտնում է ՀՀ ԱԳՆ-ն։
Այս որոշումը միաձայն ընդունվել է ՅՈՒՆԵՍԿՕ-ի գործադիր խորհրդի 221-րդ նստաշրջանում։ Հայտը մշակել էր Մեսրոպ Մաշտոցի անվան հին ձեռագրերի գիտահետազոտական ինստիտուտը:
Սա Հայաստանի ֆեոդալական իրավունքի ժողովածու է, որը կազմվել է մոտ 1184 թվականին։ Գիտնականի աշխատությունը հիմք է հանդիսացել հետագա հայկական իրավական ավանդույթի համար։ Այն սահմանում է դատավարության սկզբունքները, քաղաքացիական և քրեական իրավունքի նորմերը։
Օրենսգիրքն առաջին անգամ պարտադիր օրենքի ուժ է ստացել XIII դարում՝ Կիլիկյան Հայաստանում։ 16-րդ դարում այն պաշտոնապես ճանաչվել է Լեհաստանի թագավոր Սիգիզմունդ I-ի կողմից Լվովի, Կամենեց-Պոդոլսկիի և այլ քաղաքների հայկական համայնքների համար։
ՅՈՒՆԵՍԿՕ-ի կողմից 1992 թվականին հիմնադրված «Աշխարհի հիշողություն» ծրագիրը նպատակ ունի կանխել վավերագրական ժառանգության՝ նշանակալի և մնայուն արժեք ունեցող փաստաթղթերի հավաքածուների անդառնալի կորուստը, որպեսզի դրանք լինեն թղթային, աուդիովիզուալ, թվային կամ որևէ այլ ձևաչափով։
Աշխարհի հիշողության միջազգային ռեգիստրը փաստագրական ժառանգության ցանկ է, որտեղ ներառված են մարդկության համար բացառիկ կարևորություն և արժեք ներկայացնող փաստաթղթեր, ձեռագրեր, տեսահնչյունային նյութեր, գրադարանային հավաքածուներ և արխիվներ, այդ թվում՝ Մեսրոպ Մաշտոցի անվան Մատենադարանի հին ձեռագրերի հավաքածուն, աստղագետ Բենիամին Մարգարյանի գալակտիկաների մասին ուսումնասիրությունը (կամ Բյուրականի առաջին ուսումնասիրությունը), կոմպոզիտոր Արամ Խաչատրյանի ձեռագիր նոտաները և կինոերաժշտության հավաքածուն և Կոմիտաս վարդապետի ստեղծագործությունների հավաքածուն։
