Ապրիլի 2-ին լրանում է քառօրյա պատերազմի 9-րդ տարելիցը։ 2016-ի ապրիլի 1-ի լույս 2-ի գիշերն ադրբեջանական կողմն Արցախի Հանրապետության նկատմամբ լայնածավալ հարձակողական գործողություններ էր սկսել՝ կիրառելով իր զինանոցում առկա ռազմական տեխնիկայի գրեթե բոլոր տեսակները։ Առավել թեժ մարտեր էին ընթացել արցախա-ադրբեջանական շփման գծի հարավային՝ այս պահին օկուպացված Հադրութի և հյուսիսարևելյան՝ Մարտակերտի ուղղություններում։
Ադրբեջանը թիրախավորել էր նաև խաղաղ բնակչությանը, խաղաղ բնակավայրերի հրթիռակոծության հետևանքով Արցախի Մարտունու շրջանի Զորավան գյուղում զոհվել էր 12-ամյա Վաղինակ Գրիգորյանը, երկու երեխա վիրավորվել և տեղափոխվել էր հիվանդանոց։
Ադրբեջանական կողմն ապրիլի 3-ին հայտարարել էր, որ միակողմանի դադարեցնում է կրակը, սակայն շարունակել էր մարտական գործողությունները՝ թիրախավորելով նաև Մարտակերտի խաղաղ բնակիչներին։
Ապրիլի 5-ին հրադադար էր հաստատվել։ Վիեննայում տեղի էր ունեցել ԵԱՀԿ Մինսկի խմբի հանդիպումը՝ Արցախյան հակամարտության կարգավորման հարցով։ Այդուհանդերձ, Ադրբեջանը, ինչպես բոլոր ռազմական գործողությունների դեպքում, 2016-ին էլ էր անտեսել հրադադարը։ Ադրբեջանը մինչև ապրիլի 7-ը շարունակել էր դիմել սադրանքների։
Ապրիլի 6-ի լույս 7-ի գիշերը Թալիշի ուղղությամբ Ադրբեջանի զինված ուժերը ձեռնարկել էին դիվերսիոն հետախուզական գործողություն, բայց ՀՀ ԶՈւ-ի կողմից հետ էին շպրտվել։ Ապրիլյան պատերազմում հայկական կողմն ունեցել էր 110 զոհ և 120 վիրավոր։ Քաղաքացիական բնակչության շրջանում հայկական կողմից զոհվել էր 4 անձ։ Ադրբեջանական կողմի զոհերի թիվը, ըստ Բաքվի պաշտոնական տվյալների, 93 էր։
Կարդացեք նաև՝ Խաղաղության հասնելու հարցում Ադրբեջանի և Հայաստանի դիրքորոշումները բավականին մոտեցել են․ Ալիև
