Կոլումբիայի շրջանի դաշնային դատարանը Վաշինգտոնի վարչակազմին կարգադրել է պահպանել Signal մեսենջերում ամբողջ նամակագրությունը, որը կապված է Եմենի ուղղությամբ ԱՄՆ-ի հարվածների մասին տվյալների արտահոսքի հետ, ՏԱՍՍ-ի փոխանցմամբ՝ ասվում է դատարանի էլեկտրոնային բազայում հրապարակված որոշման մեջ։
Փաստաթղթի համաձայն՝ ԱՄՆ նախագահ Դոնալդ Թրամփի վարչակազմը, որը տվյալ դատավարության պատասխանող կողմն է, «պետք է անհապաղ բոլոր ջանքերը գործադրի մարտի 11-15-ը Signal-ում արված բոլոր հաղորդագրությունները պահպանելու համար»: Հինգշաբթի տեղի են ունեցել այս գործով առաջին լսումները։
ԱՄՆ իշխանությունների դեմ դատական հայցը ներկայացվել էր մարտի 25-ին՝ ամերիկյան ոչ կառավարական American Oversight կազմակերպության կողմից, որը հայտարարում է, թե ձգտում է հասնել երկրի իշխանությունների աշխատանքի հաշվետվողականությանը: Հայցադիմումում ընդգծվում է, որ ամերիկացի պաշտոնատար անձանց կողմից Signal-ում կարևոր հարցերի քննարկումը նորմերի խախտում է: American Oversight-ը պահանջում է նման պրակտիկան անօրինական ճանաչել։
Վաշինգտոնում ավելի վաղ սկանդալ էր ծագել, երբ պարզվել էր, որ Signal մեսենջերի խմբում, որտեղ քննարկում էին Եմենում «Անսար Ալլահ» ապստամբ շարժման հութիներին հարվածները, սխալմամբ ավելացրել են Atlantic ամսագրի գլխավոր խմբագիր Ջեֆրի Գոլդբերգին: Ավելի ուշ նա կատարվածի մասին հոդված էր գրել։ Վաշինգտոնի վարչակազմի քաղաքական հակառակորդները, մասնավորապես, մեղադրել են Թրամփի ազգային անվտանգության հարցերով օգնական Մայք Ուոլցին՝ գաղտնի տվյալների հետ ոչ պատշաճ վարվելու համար, քանի որ նա պատասխանատու էր խմբի ձևավորման համար:
