Մոսկվան ակնկալում է, որ Ադրբեջանը հավատարիմ կմնա Ռուսաստանի հետ դաշնակցային համագործակցության սկզբունքներին, հայտարարել է ՌԴ փոխարտգործնախարար Միխայիլ Գալուզինը, հայտնում է «ՌԻԱ Նովոստին»։ Փոխարտգործնախարարը մեկնաբանել է երկու երկրների հարաբերություններում փոփոխությունները, այդ թվում՝ Ռուսական տան փակումը և Ադրբեջանում Sputnik գործակալության գրասենյակի լուծարումը։
«Վստահ եմ, որ պաշտոնական Բաքուն հասկանում է մեր երկրների միջև դաշնակցային համագործակցության կարևորությունը ղեկավարների կողմից ձեռք բերված պայմանավորվածությունների շրջանակներում։ Ուզում եմ հուսալ, որ մեր ադրբեջանցի գործընկերների գործողությունները կբխեն մեր հարաբերությունների բոլոր ասպեկտներն ընդգրկող այդ համաձայնագրերի իրականացման առանցքային կարևորության ըմբռնումից», – լրագրողների հետ զրույցում նշել է Գալուզինը։
Նա ընդգծել է, որ փոխգործակցության հիմքը մնում են երկրների ղեկավարների որոշումները, և ցանկացած գործողություն, որը դուրս է դաշնակցային ձևաչափից, պետք է բացառվի։
Այսօր ավելի վաղ ադրբեջանական լրատվամիջոցները հայտնել էին Բաքվում Sputnik գործակալության ադրբեջանական գրասենյակի վերջնական լուծարման մասին։ Ռուսաստանի և Ադրբեջանի հարաբերությունները վատթարացել էին նախորդ տարվա դեկտեմբերին AZAL ինքնաթիռի կործանումից հետո։ Ադրբեջանի նախագահ Իլհամ Ալիևը հայտարարել էր, որ ինքնաթիռը «խոցվել է ռուսական տարածքում» և պահանջել էր, որ ռուսական կողմը ներողություն խնդրի Բաքվից։
Փետրվարին Ադրբեջանը ռուսական կողմին պաշտոնական ծանուցում էր ուղարկել իր տարածքում «Ռոսսոտրուդնիչեստվոյի» աշխատանքը դադարեցնելու մասին։ Դա տեղի է ունեցել այն բանից հետո, երբ ադրբեջանական իշխանամետ հեռուստաալիքներից մեկը հրապարակել էր ռեպորտաժ, որտեղ ռուսական կենտրոնի աշխատակիցները մեղադրվում են ոչ բարեկամական և լրտեսական գործունեության մեջ։ Ի պատասխան՝ «Ռոսսոտրուդնիչեստվոյի» ղեկավար Եվգենի Պրիմակովը հայտարարել էր, որ կազմակերպության գործունեությունը սահմանափակվում է կրթության, մշակույթի և գիտության ոլորտներով։
