Ջորջ Աղջայանն ստանձնել է ԱՄՆ Հայ դատի հանձնախմբի (ANCA) նախագահի պաշտոնը՝ փոխարինելով Րաֆֆի Համբարյանին, հայտնում է կազմակերպության մամուլի ծառայությունը։
«Մեր աշխատանքն ավելի քան երբևէ կարևոր է, քանի որ պայքարում ենք արցախահայության իրավունքների, Ադրբեջանին իր հանցագործությունների համար պատասխանատվության ենթարկելու և Հայաստանի երկարաժամկետ անվտանգությունն ու կենսունակությունը ապահովելու համար»,- ասել է Աղջայանը։
Նա կազմակերպությունն անվանել է ամերիկահայերի ամենաարդյունավետ ձայնն ինչպես ԱՄՆ արտաքին, այնպես էլ ներքին քաղաքականության մեջ։
Աղջայանը նախկինում աշխատել է որպես ANCA-ի Կենտրոնական Մասաչուսեթսի մասնաճյուղի տնօրեն: Նա զբաղվել է համայնքը մոբիլիզացնելու կարևոր հարցերով և ամրապնդել հարաբերությունները պետական պաշտոնյաների հետ:
ANCA-ի մամուլի ծառայությունը նշել է, որ Աղջայանի գլխավորությամբ կոմիտեն կշարունակի պայքարել Ադրբեջանում հայ գերիների և քաղբանտարկյալների ազատ արձակման, Ազատության աջակցության ակտի 907-րդ հոդվածի իրականացման համար, որն արգելում է ԱՄՆ-ին ռազմական օգնություն տրամադրել Ադրբեջանին՝ ի պատասխան Հայաստանի դեմ շարունակվող ագրեսիայի և Արցախում ցեղասպանության։
Կազմակերպությունը մտադիր է նաև պատժամիջոցներ կիրառել «Մագնիտսկու ակտի» համաձայն՝ ռազմական հանցագործությունների և մարդու իրավունքների խախտման համար պատասխանատու ադրբեջանցի պաշտոնյաների նկատմամբ:
2024 թվականի հունիսին Հայ դատի Վաշինգտոնի հանձնախմբի մամուլի քարտուղար Եղիսաբեթ Չուլջյանն Armenia Today-ին պատմել էր ԱՄՆ վարչակազմին ուղղված կոմիտեի աշխատանքների մասին՝ Արցախի ժողովրդին 200 միլիոն դոլարի օգնություն տրամադրելու և Ադրբեջանի կառավարության դեմ պատժամիջոցներ կիրառելու համար։
