ԱՄՆ մի շարք կոնգրեսականներ նամակով դիմել են պետքարտուղար Մարկո Ռուբիոյին՝ կոչ անելով նպաստել Բավքում պահվող հայ ռազմագերիների ազատ արձակմանը և Կովկասում խաղաղության ապահովմանը, հայտնում է ANCA-ն։
Նամակն ստորագրել են ԱՄՆ Կոնգրեսի հայկական հարցերով հանձնախմբի համանախագահներ, դեմոկրատ կոնգրեսական Ֆրենք Փալոնը և հանրապետական Գաս Բիլիրակիսը, ինչպես նաև փոխհամանախագահներ, դեմոկրատ Բրեդ Շերմանն ու հանրապետական Դեյվիդ Վալադաոն:
Կոնգրեսականները նամակում Միացյալ Նահանգներին կոչ են անում պատասխանատվության ենթարկել Ադրբեջանին իր ռազմական հանցագործությունների և Լեռնային Ղարաբաղում էթնիկ զտումների համար՝ Բաքվի դեմ կիրառել Ազատության աջակցության ակտի 907-րդ հոդվածը, Գլոբալ Մագնիցկի ակտով սահմանված պատժամիջոցները և մերժել EXIM բանկի ֆինանսավորումն Ադրբեջանին։
«Հայաստանի և Ադրբեջանի միջև կայուն և արժանապատիվ խաղաղությունը պահանջում է խիստ հաշվետվողականություն և պետք է հիմնված լինի իրենց բնիկ տարածք՝ Լեռնային Ղարաբաղ, հայերի պաշտպանված վերադարձի իրավունքի վրա։ Ադրբեջանի հետ վերջնական համաձայնագիրը պետք է նաև ապահովի բոլոր ռազմագերիների և պատանդների, այդ թվում՝ ԼՂ քաղաքական առաջնորդների ազատ արձակումը, որոնք անարդարացիորեն կալանավորված են Ադրբեջանում, և պաշտպանի հայկական հնագույն մշակութային վայրերը ԼՂ-ում և տարածաշրջանի այլ վայրերում, որոնք անմիջական սպառնալիքի տակ են»,- ասվում է նամակում։
Հիմնական խնդրանքներից նշվում է այն, որ Միացյալ Նահանգները շարունակի կառուցել Հայաստանի հետ հարաբերությունները՝ հենվելով 2025 թվականի հունվարի 15-ին ստորագրված ռազմավարական գործընկերության համաձայնագրի վրա:
Կոնգրեսականներն ընդգծել են, որ Հայաստանը բախվում է բազմաթիվ աշխարհագրական և քաղաքական մարտահրավերների՝ որպես դեպի ծով ելք չունեցող երկիր, շրջափակված Թուրքիայի և Ադրբեջանի կողմից:
«Այս խոչընդոտները վաղուց խանգարում են նրա տնտեսական ներուժին։ Միացյալ Նահանգները փայլուն հնարավորություն ունի ձևավորելու տարածաշրջանի ապագան՝ առաջ մղելով Հայաստանի էներգետիկ անվտանգությունը և տնտեսական ճկունությունը՝ համահունչ լինելով «Խաղաղության խաչմերուկ» տեսլականին հանուն կայուն խաղաղության»,- շեշտել են նրանք։
Ըստ կոնգրեսականների՝ նման ներդրումները թույլ կտան Հայաստանին իրականացնել իր նպատակը՝ դիվերսիֆիկացնել էներգաարտադրությունը և վերացնել ռուսական էներգետիկ և առևտրային կախվածությունը:
Կոնգրեսականները նաև Պետքարտուղարությանը կոչ են արել հիմք ընդունել Հայաստանի հետ ներկայիս պաշտպանական հարաբերությունները՝ զարգացնելու համար Հայաստանի սահմանային անվտանգության կարողությունները։
Նրանք պետքարտուղարին խնդրել են ամբողջությամբ դիտարկել Հայաստանի կառավարության խնդրանքը՝ բացառապես պաշտպանական սարքավորումներ և համապատասխան թրեյնինգներ տրամադրելու վերաբերյալ, որը ներառում է նաև հակաօդային և հակադրոնային համակարգեր:
Կոնգրեսականներն ընդգծել են, որ Հայաստանի կարողությունների մեծացումը սահմանները պահպանելու հարցում չափազանց կարևոր է այն ժամանակ, երբ այն բախվում է իր ինքնիշխան տարածքում տեղակայված ադրբեջանական զորքերի շարունակական սպառնալիքներին և Ադրբեջանի նախագահ Իլհամ Ալիևի բռնի հռետորաբանությանը:
Կոնգրեսականները պետքարտուղարի ուշադրությունն են հրավիրել նաև այն մարտահրավերներին, որոնց առերեսվում է հայ համայնքը Սիրիայում և տարածաշրջանում։
ՀՀ-ն և ԱՄՆ-ն հունվարի 14-ին Վաշինգտոնում ստորագրել էին ռազմավարական գործընկերության կանոնադրությունը։ Փաստաթուղթն ստորագրել էին ՀՀ ԱԳ նախարար Արարատ Միրզոյանը և ԱՄՆ նախկին պետքարտուղար Էնթոնի Բլինքենը։ Հունվարի 15-ին Պետդեպարտամենտը մեկնաբանել էր Հայաստանի հետ ստորագրված ռազմավարական գործընկերության կանոնադրությունը։ ՀՀ ԱԳՆ-ն, իր հերթին, մանրամասն տվյալներ էր ներկայացրել, թե ինչ է պարունակում Հայաստանի և Միացյալ Նահանգների միջև ռազմավարական գործընկերության փաստաթուղթը։
