Երեկ առավոտյան Սևանա լճից հայտնաբերված կոմպոզիտոր Անահիտ Հակոբի Մնացականյանի դեպքը շատ նման է դժբախտ պատահարի, գրել է «Հրապարակ»-ը՝ հղում անելով Սևանի իր աղբյուրին։
Ըստ թերթի՝ տեղում գտնվողներից մեկը պատմել է, որ հունիսի 1-ի առավոտյան ափով անցնելիս տեսել է աղջկա շորերը։
«Հավաքեցինք, տարանք նրա համարի մոտ, որ չուշանա նախաճաշից, բայց հետո պարզվեց, որ նա նախաճաշի չի եկել։ Ահազանգեցինք ոստիկանություն»,- թերթին պատմել է քաղաքացին։
Ըստ աղբյուրի՝ աղջիկը, որ մենակ էր հանգստանում, ընդամենը ցանկացել է լողալ։
Նշենք, որ երեկ՝ հունիսի 3-ին, երեք օրվա որոնողական աշխատանքներից հետո ափից մոտ 70 մ հեռավորության և 4 մ խորության վրա ՆԳՆ փրկարար ծառայությունը հայտնաբերել էր Մնացականյանի դին և դուրս բերել։
Հունիսի 2-ին հայտնել էինք, որ որպես անհետ կորած որոնում են 25-ամյա կոմպոզիտոր Անահիտ Մնացականյանին։ Վերջին անգամ նրան մտերիմները տեսել էին գիշերը 22։30-ին՝ ափին նստած։
