Մայր Աթոռը դատապարտել է ցուցարարների նկատմամբ ոստիկանների գործողությունները

Մայր Աթոռ Սուրբ Էջմիածինը դատապարտել է ոստիկանների բռնությունները ցուցարարների նկատմամբ, հայտնում է ՀԱԵ մամուլի ծառայությունը։

Ամենայն Հայոց կաթողիկոս Գարեգին Բ-ի նախագահությամբ կայացած Գերագույն հոգևոր խորհրդի ժողովը հայտարարել է, որ երկրում ստեղծված ճգնաժամի խորացման պատճառով իրենց խաղաղ բողոքն արտահայտող քաղաքացիների նկատմամբ ոստիկանները կիրառում են ակնհայտ անհամաչափ ուժ՝ «բռնությունների դատապարտելի դրսևորումներով»։

Մայր Աթոռը նշել է, որ նման գործողությունները խորացնում են ներհասարակական լարվածությունը և կարող են հանգեցնել անկանխատեսելի հետևանքների։

Գերագույն հոգևոր խորհուրդը ոստիկաններին կոչ է արել իրենց պարտականությունների կատարման ընթացքում հարգել հայրենակիցների հիմնարար իրավունքները և գործել միմիայն մարդասիրության և օրինականության սկզբունքների պահպանությամբ։

Ժողովը նաև հանրային գործողությունների մասնակիցներին հորդորել է իրենց բողոքն արտահայտել բացառապես օրենքի շրջանակներում և չտրվել հնարավոր սադրանքների։

«Միաժամանակ՝ պատգամում ենք Հայաստանյայց Առաքելական Սուրբ Եկեղեցու զավակներին և մեր բոլոր հայրենակիցներին այս բարդ իրադրության մեջ դրսևորել պատասխանատվություն և ամենայն ջանք գործադրել՝ ի խնդիր հայրենիքի առջև ծառացած գոյաբանական մարտահրավերների հաղթահարման, հայոց պետականության անխաթար պահպանության և ամրապնդման»,- ասվում է հայտարարության մեջ։

Տավուշի սահմանամերձ գյուղերի բնակիչները բողոքի ակցիաներ էին սկսել ՀՀ ԱԳՆ-ի՝ ապրիլի 19-ին հայտարարությունից հետո, որով Հայաստանն ու Ադրբեջանը պայմանավորվել են սահմանազատման գործընթացն սկսել Տավուշից։ Բնակիչները հայտարարել էին, որ դեմ են Հայաստանի զիջումներին։ Մայիսի 4-ին «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրն անցկացրել առաջին հանրահավաքը՝ հայտարարելով, որ պատրաստվում են ԱԺ-ում Փաշինյանին անվստահության գործընթաց սկսել։ Մայիսի 13-16-ն անհնազանդության ակցիաներ էին իրականացվել։

Երևանն ու Բաքուն մայիսի 15-ին ստորագրել էին Տավուշում սահմանի սահմանազատման արձանագրությունը։ Մայիսի 24-ին ՀՀ ԱԱԾ-ն հայտարարել էր, որ սահմանապահ զորքերը Տավուշում պաշտոնապես անցել են Ադրբեջանի հետ սահմանազատված սահմանի պահպանությանը, որը կիրականացվի Բերքաբեր բնակավայրի 1,9 կմ, Ոսկեպար և Բաղանիս բնակավայրերի 4,9 կմ հատվածներում։

Մայիսի 26-ին «Տավուշը հանուն հայրենիքի» շարժումը հանրահավաք էր իրականացրել, որի ընթացքում հայտարարել էին, որ իրենց վարչապետի թեկնածուն Բագրատ Սրբազանն է։ Շարժումը պահանջել է վարչապետ Նիկոլ Փաշինյանի հրաժարականը՝ հայտարարելով մայիսի 27-ից անհնազանդության ակցիաներ սկսելու մասին։ Մայիսի 27-ին «Տավուշը հանուն հայրենիքի» շարժման ակցիաներից բերման էր ենթարկվել 284 քաղաքացի։