Իսրայելցի փաստաբան Դանիել Սայդեմանը հայտարարել է, որ Իսրայելի իշխանություններն աջակցում են Երուսաղեմի հայկական թաղամասին Xana Capital-ի տիրանալու փորձերին՝ նպատակ ունենալով հրեական թաղամասը կապել Յաֆայի դարպասի հետ, հայտնում է The Irish Times-ը։ «Բնակիչները շահագրգռված են, որ Յաֆֆայի դարպասի և քաղաքի հրեական թաղամասի միջև շարունակական կամուրջ ստեղծեն», - մեջբերում է թերթը Սայդեմանի խոսքերը։
Փաստաբանն ընդգծել է Xana Capital-ի գործողությունների համընկումն «իսրայելական իշխանությունների կողմից աջակցվող ավելի լայն ռազմավարության հետ՝ հին քաղաքը բնակավայրերով և աստվածաշնչյան ներշնչված բնակավայրերի նախագծերով շրջապատելու համար»:
«Իսրայելի ներխուժումը պաղեստինյան Շեյխ Ջարահ շրջան և Ձիթենյաց լեռան վրա բնակիչների կողմից ազգային պարկի ստեղծման առաջարկները ծառայում էին նույն նպատակին»,- ասել է նա: Հոդվածի հեղինակ, իռլանդացի լրագրող Հաննա Մաքքարթին նշել է, որ Երուսաղեմի մուսուլմանական և քրիստոնեական թաղամասերի բազմաթիվ գույքեր ներգրավված են եղել կեղծ ընկերությունների հետ գործարքների մեջ։ Միևնույն ժամանակ, վերաբնակիչների հետ կապված խմբերն են դատական հայց ներկայացնում այդ տարածքները գրավելու համար, հավելել է նա։
Սայդեմանը «Կովերի այգու» շուրջ աճող լարվածությունը բացատրում է իսրայելա-պաղեստինյան պատերազմի վրա ԶԼՄ-ների ուշադրության սևեռմամբ, որը որոշ վերաբնակիչներ ընկալել են որպես ռազմավարական նշանակություն ունեցող հայկական վայրն արագորեն գրավելու հնարավորություն: «Այն, ինչ տեղի է ունենում այնտեղ, վտանգ է ոչ միայն հասարակության, այլև քաղաքի ամբողջականության համար։ Երուսաղեմը Երուսաղեմ չէր լինի առանց ակտիվ հայ համայնքի»,- եզրափակել է իսրայելցի փաստաբանը։
Ավելի վաղ Սայդեմանը մեկնաբանել էր այգու հետ կապված միջադեպը և ոստիկանության գործողություններն անվանել «կառավարական նախագիծ»։ Ըստ Սայդեմանի՝ ՀԱԵ-ի Երուսաղեմի պատրիարքարանի անվտանգության ուժերը պահանջել են այդ հողերի սեփականության ապացույցը:
Նոյեմբերի 8-ին Երուսաղեմի հայ համայնքի ներկայացուցիչ Յակոբ Ճռնազեանը հայտնել էր, որ Երուսաղեմի հայկական թաղամասի պահպանման համար դատական պայքար է ընթանում, կարող են դիմել նաև ՄԻԵԴ։
Նոյեմբերի 1-ին Երուսաղեմի Հայոց պատրիարքարանի դիվանապետ Աղան Գոգչյանը տեղեկացրել էր, որ պատրիարքությունը նամակ է ուղարկել «Xana Gardens Ltd»-ին՝ հայտնելով, որ չեղարկել է Երուսաղեմի Հին քաղաքի հայկական թաղամասի «Կովերի պարտեզ» կալվածքի վերաբերյալ 2021թ․ հուլիսի 8-ին ստորագրված համաձայնագիրը։ Գոգչյանը տեղեկացրել էր նաև, որ նամակին պատասխան տալու փոխարեն երկրորդ կողմը սկսել է կալվածքի պարիսպը և կայանատեղերը քանդել, ասֆալտը հեռացնել՝ սպառնալով շատ ավելի մեծ վնաս պատճառել:
Ճռնազեանը 2023 թվականի հունիսի 21-ին BBC-ի ռուսական ծառայությանը հայտնել էր Երուսաղեմի Հին քաղաքում գտնվող հայկական թաղամասի մի մասը 99 տարով «հրեական ծագումով ավստրալացի խորհրդավոր գործարարին շքեղության զարգացման համար» փոխանցելու մասին։ Հայ առաքելական եկեղեցու Երուսաղեմի պատրիարք Նուրխան Մանուկյանը, ըստ հրապարակման, ընդունել էր, որ հողի վարձակալության պայմանագիր է կնքել, սակայն ասել էր, որ դարձել է իր ենթակայի՝ տեղի հայկական եկեղեցու քահանա Խաչիկ Երիցյանի խաբեության զոհը, ով ավելի ուշ հեռացվել էր:
