Գործարար Ռոման Տրոցենկոյի կողմից ստեղծված Infrastructure Corporation AEON LLC (AEON Corporation)-ն ընդգրկվել է ԱՄՆ պատժամիջոցների ցանկում, հայտնում է Interfax-ը։
Պատժամիջոցները ներառում են նաև ընկերության հարակից կառույցները։ Բացի այդ, ցուցակում ներառված է Գլեբ Ռոմանովիչ Տրոցենկոն (այդպես է կոչվում Ռոման Տրոցենկոյի որդիներից մեկը) և նրա հետ կապված երկու ընկերություններ՝ «Սթարթ Աերո» ՍՊԸ-ն և «Լեքս Պրայմ» ՍՊԸ-ն:
AEON Corporation-ը բազմապրոֆիլ հոլդինգ է, որը ներդրումներ է կատարում բնակելի և արդյունաբերական օբյեկտների, օդանավակայանների (Նովապորտ խումբը հոլդինգի մի մասն է) և գետային տրանսպորտի ձեռնարկությունների կառուցման մեջ: Կորպորացիայի արդյունաբերական ուղղությունը ներկայացված է «երեք կարևորագույն նախագծերով»։
Ավելի վաղ՝ ապրիլի 12-ին, ԱՄՆ Առևտրի նախարարությունը պատժամիջոցների ցանկում ներառել էր հայաստանյան «Tako LLC» ընկերությունը, իսկ մայիսի 19-ին պատժամիջոցներ էր սահմանել նաև լաբորատոր սարքավորումների և քիմիական նյութերի վաճառքով զբաղվող հայկական «Medisar» ընկերության դեմ։ Ավելի ուշ՝ մայիսի 22-ին, ՀՀ Վարչապետ Նիկոլ Փաշինյանը հայտարարել էր՝ Հայաստանը Ռուսաստանի հետ այնպես կաշխատի, որ չհայտնվի Արևմտյան պատժամիջոցների տակ։
