ԱԺ «Հայաստան» խմբակցության պատգամավոր Գեղամ Նազարյանը Հանրային հեռուստաընկերության եթերում հայտարարել է, որ ընդդիմությունը Լևոն Քոչարյանին պատգամավոր դարձնելու խնդիր չէր դրել։
«Եթե Լևոն Քոչարյանին պատգամավոր դարձնելու խնդիր լիներ, այդ հարցը վաղուց կլիներ և նա չէր լինի ցուցակում 50-րդ համարը, այլ կլիներ՝ 20-ը»,- նշել է նա։
Նազարյանը չի համաձայնել այն պնդման հետ, թե ընդդիմությունը ֆրակցիան ծառայեցրել է մեկ մարդու կալանքից դուրս գալու համար։
«Այդ նույն պնդումը դուք (Պետրոս Ղազարյանը) կարող եք անել, թե ինչու պատգամավոր դարձավ մեզ մոտ («Հայաստան» խմբակցությունում) Իրինա Պետրոսյանը, երբ մենք ունեինք պատգամավորներ իրենից առաջ, որոնք պետք է պատգամավոր դառնային»,- ասել է նա։
Մեկնաբանելով «Հայաստան» խմբակցության պատգամավոր Արմեն Չարչյանի պատգամավորական մանդատից հրաժարվելը՝ Նազարյանը նշել է, որ վերջինս ավելի քան 2-3 ամիս ունեցել է նման մտադրություն։
«Պարոն Չարչյանն ավելի քան 2-3 ամիս այդ մտադրությամբ գալիս էր խմբակցություն և ասում․ «Ես ինձ չեմ տեսնում պատգամավորի աթոռին նստած»»,- ասոլ ՝ Նազարյանը՝ նշելով, որ մանդատներից հրաժարված մյուս պատգամավորների հետ չի խոսել և ներկայացնում է միայն Չարչյանի հարցը։
Հերքելով պնդումը, որ ակնհայտորեն ամեն ինչ արվել է Լևոն Քոչարյանին կալանքից ազատելու համար, Նազարյանը նշել է, որ ակնհայտ է միայն այն, որ Լևոն Քոչարյանը կալանավորված էր ապօրինաբար և շինծու գործով։
«Լևոն Քոչարյանի դեմ քրեական գործ էր հարուցված։ Եթե այդ քրեական գործն այդքան ճիշտ են հարուցել, ապա որևէ մեկը պատգամավոր դառնալով չի կարող քրեական գործից խուսափել»,- հավելել է նա։
Ավելի վաղ հայտնել էինք, որ Լևոն Քոչարյանն ազատ է արձակվել «Նուբարաշեն» ՔԿՀ-ից։
Նոյեմբերի 2-ին «Հրապարակ»-ը գրել էր, որ դաշինքը որոշել է պատգամավորական մանդատ փոխանցել Լևոն Քոչարյանին։ «Հայաստան» դաշինքի պատգամավոր Քրիստինե Վարդանյանը Armenia Today-ի հետ զրույցում ո՛չ հերքել, ո՛չ հաստատել էր այս տեղեկությունը և հորդորել էր սպասել հայտարարությունների։
Նոյեմբերի 5-ին Քոչարյանի փաստաբանական խումբը հաստատել էր վերջինիս պատգամավոր դառնալու փաստը։
ԿԸՀ-ն նոյեմբերի 6-ի արտահերթ նիստում ընդունված արձանագրությամբ՝ կալանքի տակ գտնվող Լևոն Քոչարյանին պատգամավորի մանդատ էր փոխանցվել։
Սեպտեմբերի 22-ին Լևոն Քոչարյանը կարմիր բերետավորների կողմից դաժան ծեծի էր ենթարկվել և հոսպիտալացվել։ Ավելի ուշ փաստաբան Ալեքսանդր Կոչուբաևը հայտնել էր վերջինիս ձերբակալության մասին (ոստիկանները հաղորդում էին ներկայացրել, որ Լևոն Քոչարյանը 4 կարմիր բերետավորի է ծեծել)։ Սեպտեմբերի 25-ին Լևոն Քոչարյանը մեկ ամսով կալանավորվել էր: Հոկտեմբերի 16-ին վերջինիս կալանքը երկարացնելու միջնորդություն էր ներկայացվել։ Հոկտեմբերի 19-ին Լևոն Քոչարյանի կալանքը երկու ամսով երկարաձգվել էր։
