ԱՄՆ Կոնգրեսի Ներկայացուցիչների պալատի էներգետիկայի և առևտրի հանձնաժողովի անդամ Ֆրենկ Փալոնը մեկնաբանել է սեպտեմբերի 1-ին Գեղարքունիքի մարզում Հայաստանի վրա Ադրբեջանի հարձակումը, որի հետևանքով զոհվել է երեք հայ զինծառայող, վիրավորվել՝ երկուսը։
«Ադրբեջանական ուժերի մահաբեր հարձակումները և այս շաբաթվա սկզբին անմեղ հայ ուսանողների նկատմամբ դաժան վերաբերմունքը ևս մեկ անգամ ապացուցում են, որ Ալիևն օգտագործում է Լաչինի շրջափակումը՝ Արցախում հայերին վախեցնելու համար: Նա խորացնում է հայերի դեմ էթնիկ զտումների իր արշավը»,- գրել է կոնգրեսականը X-ի (նախկին Twitter-ի) իր միկրոբլոգում։
Հայ-ադրբեջանական սահմանին լարվածության նոր փուլ է սկսվել սեպտեմբերի 1-ին, երբ, ըստ ՀՀ ՊՆ-ի, ժամը 7:50-ից Ադրբեջանի զինված ուժերն ինտենսիվ կրակ են բացել Գեղարքունիքի մարզի Սոթքում և Նորաբակում գտնվող հայկական դիրքերի ուղղությամբ: Հայկական կողմը հայտնել էր ադրբեջանական ստորաբաժանումների կողմից հրետակոծության հետևանքով 4 զոհի և մեկ վիրավորի մասին, Ադրբեջանը հայտնել է երեք վիրավորի մասին։ Ավելի ուշ ՀՀ ՊՆ-ն տեղեկացրել էր, որ զոհված համարվող զինծառայողի սրտի զարկը վերականգնվել է և հայտնել, որ հայկական կողմն ունի 3 զոհ։
Կարդացեք և դիտեք Armenia Today-ի բացառիկ ռեպորտաժը այն մասին, թե ինչպես է ապրում սահմանային Սոթքը, որը 2022 թվականի սեպտեմբերի 13-ին ադրբեջանական զինուժի կրակոցների տակ էր ընկել։
