«Օծանելիքը կնոջ մասին ավելին է պատմում, քան նրա ձեռագիրը»,-մի անգամ ասել Է Կոկո Շանելը: Այնուամենայնիվ, ըստ Thevoicemag.ru-ի, կան դեպքեր, երբ ավելի լավ է ներկայանալ առանց սիրելի օծանելիքի:
Կլինիկայում կամ հիվանդանոցում
Էթիկետի մարզիչ Էստենիա Գուդրիջը բժշկի այցելելուց խորհուրդ է տալիս հրաժարվել օծանելիքից։
«Առողջապահական հաստատություններում մարդիկ հաճախ ստիպված են լինում նստել միմյանց մոտ, իսկ հիվանդանոցում դուք կարող եք հանդիպել մեկին, որն ալերգիկ է»,-բացատրում է նա:
Հղի կանանց շրջանում
Գիտնականները մինչ օրս համաձայնության չեն եկել, թե կանանց մոտ հղիության ընթացքում ինչու է սրվում հոտառությունը, սակայն այդ փաստն արդեն վաղուց հայտնի է բոլորին: Նորաձևության բլոգեր և ոճաբան Շանթել Հարթման Մալարկին խորհուրդ է տալիս հղի կանանց հետ շփվելու դեպքում օծանելիք չօգտագործել։
Հոգեհանգստի կամ հուղարկավորության ժամանակ
Էթիկետի փորձագետ Լիզա Գրոտսի կարծիքով՝ նման օրերի ժամանակ ոչ ոք չի ցանկանա ուշադրություն գրավել։ Բացի այդ, ըստ նրա, եթե հանգուցյալին հրաժեշտ տալը տեղի է ունենում փոքր սենյակում, ապա հոտը կարող է առաջացնել միգրեն կամ այլ տհաճ երևույթներ։ Նրա խոսքով՝ դա անհարգալից վերաբերմունք կլինի հանգուցյալի և նրա սիրելիների նկատմամբ:
Մարզասրահում
«Քրտինքն ու օծանելիքի բույրն անհամատեղելի են»,-կարծում է Գրոտսը։ Ֆիթնեսի պարապմունքների ժամանակ նա խորհուրդ է տալիս օգտագործել դեզոդորանտ, որը կչեզոքացնի քրտինքի հոտը։ Մարզասրահի մյուս բոլոր այցելուները դրա համար միայն շնորհակալ կլինեն:
Բազմամարդ համերգների ժամանակ
Գուդրիջը շեշտում է, որ նշվածը վերաբերում է նաև բացօթյա միջոցառումներին, քանի որ ամառային շոգն էլ ավելի է ուժեղացնում բույրերը։ Այնուամենայնիվ, նա կարծում է, որ թեթև և աննկատելի բույր օգտագործումը թույլատրելի է։
