Ադրբեջանական զինուժի կողմից Երասխ գործարանի գնդակոծման պատճառն ակնհայտ է՝ «խոչընդոտել Հայաստանի տնտեսական աճին», լրագրողներին ասել է «GTB Steel» հոլդինգի տնօրեն Տիրան Հակոբյանը։ Սա ձեռնարկության զգալի ներդրումն է Հայաստանի տնտեսության մեջ, հավելել է նա։ Հակոբյանը պարզաբանել է, որ գործարանը նախատեսում է տարեկան արտադրել մինչև 250 հազար տոննա ամրան։
«Երասխում մետալուրգիական կոմբինատի շինարարությունն անպայման կվերսկսվի մի շարք տեխնիկական հարցերի պարզաբանումից և իշխանությունների հետ խորհրդակցություններից հետո»,- ընդգծել է շինարարական օպերատորը։
Շինարարությունը, ըստ նրա, նախատեսվում է ավարտել 2023 թվականի դեկտեմբերին։ «Գործարանի արտադրանքը՝ կցամասերը, վաճառելու ենք հիմնականում Հայաստանում, ինչպես նաև Մերձավոր Արևելքի որոշ երկրներում»,- մանրամասնել է տնօրենը։
Հակոբյանը տեղեկացրել է նաև, որ ադրբեջանական զինուժի գնդակոծության հետևանքով բեկորային վնասվածքներ ստացած Հնդկաստանի երկու քաղաքացիներն Արարատի բժշկական կենտրոնում արդեն վիրահատվել են, նրանց վիճակը բավարար է։
«Շինարարական աշխատանքներում աշխատում է մոտ 200 մարդ, որոնցից մոտ 70-ը Հնդկաստանի քաղաքացիներ են։ Սա բավականին բարդ տեխնոլոգիական գործընթաց է, և մեզ օգնում են մեր հնդիկ գործընկերները, ովքեր ունեն համապատասխան գիտելիքներ»,- ասել է հոլդինգի տնօրենը։
Հնդկաստանի քաղաքացիները, ըստ նրա, մտահոգված են կատարվածով, սակայն չեն պատրաստվում հեռանալ Երասխից։ Հակոբյանը նաև հավելել է, որ Հայաստանում Հնդկաստանի դեսպանատան աշխատակիցները հունիսի 14-ին այցելել են իրենց վիրավոր համաքաղաքացիներին և մշտական կապի մեջ են հոլդինգի ղեկավարության հետ։
Հակոբյանը հրետակոծությունից առաջացած վնասը համարել է աննշան՝ մանրամասնելով, որ վնասվել են երկու ամբարձիչներ և մեկ ավտոմեքենա։
Հակոբյանը բացատրել է նաև, թե ինչու է շինհրապարակ ընտրվել սահմանամերձ Երասխը. «Հանրապետության տարբեր մարզերում գործարան կառուցելու տարբեր առաջարկներ ստացանք, բայց նպատակաուղղված ընտրեցինք Երասխը, քանի որ շատ ենք կարևորում այս սահմանային գոտու զարգացումը։ Մեր հոլդինգը որոշակի հարկային արտոնություններ ստացավ, բայց մենք, մասնավորապես, հրաժարվել ենք այդ արտոնություններից մեկից և վճարում ենք ԱԱՀ»,- ընդգծել է ընկերության տնօրենը։
Նրա խոսքով՝ հոլդինգի սեփականատերերն ամերիկյան ընկերություններ են՝ ԱՄՆ քաղաքացի Բոբի Քանգի և Հայաստանի քաղաքացի Գրիգոր Տեր-Ղազարյանի գլխավորությամբ։
Երասխ համայնքի ղեկավար Սարո Այվազյանն էլ հայտարարել է, որ ադրբեջանական զինուժի կողմից գնդակոծված Երասխում մետաղագործական գործարանի կառուցումը շարունակվելու է։ Նա հավելել է, որ կառավարությունը պետք է համապատասխան քայլեր ձեռնարկի սահմանի այս հատվածի անվտանգությունն ապահովելու համար։ Այսօր Երասխի ուղղությամբ կրակոցներ չեն եղել, նշել է նա։
«Գործարանի շինարարությունն սկսվել է 6-7 ամիս առաջ, այս ամբողջ ընթացքում այս տարածքի գնդակոծում չի եղել։ Ընդհանուր առմամբ, Երասխը վերջին անգամ գնդակոծվել է ավելի քան մեկ տարի առաջ»,- ասել է Այվազյանը։
Հայ-ադրբեջանական սահմանին լարվածության նոր փուլը սկսվել է հունիսի 13-ին, երբ, ըստ ՊՆ-ի, ժամը 18:40-ի սահմաններում ադրբեջանական զինուժի ստորաբաժանումները տարբեր տրամաչափի հրաձգային զինատեսակներից կրակ են բացել Երասխում տեղակայված հայ դիրքապահների ուղղությամբ։ Գնդակոծության հետևանքով վնասվել է քաղաքացիական ավտոմեքենա և այլ քաղաքացիական ենթակառուցվածքներ։ Հունիսի 14-ին Ադրբեջանը կրակ է բացել Երասխում կառուցվող մետալուրգիական գործարանի ուղղությամբ։ Պաշտպանության նախարարությունն ավելի ուշ հայտնել է, որ երկու օտարերկրացի՝ Հնդկաստանի քաղաքացիներ Մուհամմադ Ասիֆը և Միրհասան Սահաջանը վիրավորվել են, նրանց վիրահատել են։ Պաշտպանության փոխնախարար Արման Սարգսյանը հայտարարել է հայ-ադրբեջանական սահմանին լարվածության աճի միտումի մասին։
