Թուրքիայի արևելքում գտնվող Կարս նահանգում շարունակվում են Թուրքիայի պատմության մեջ ամենախոշոր ձմեռային զորավարժությունները, հայտնում է Անադոլու գործակալությունը։
Զորավարժություններին Թուրքիայի զինված ուժերի ստորաբաժանումների հետ միասին մասնակցում են 17 երկրների զինվորականներ, այդ թվում՝ Գերմանիայից, Ադրբեջանից, Ղազախստանից և Մեծ Բրիտանիայից։
Զորավարժություններն անցկացվում են Թուրքիայի զինված ուժերի 14-րդ մոտոհրաձգային բրիգադի հրամանատարության պատասխանատվության գոտում։ Զորավարժությունների կառավարումը վստահվել է Թուրքիայի զինված ուժերի ցամաքային զորքերի 9-րդ կորպուսի հրամանատարությանը։
Ընդհանուր առմամբ, 2023 թվականի ձմեռային զորավարժություններին մասնակցում է 1758 զինծառայող, ներգրավված է 651 միավոր 43 տեսակի տեխնիկա, օգտագործվում է 865 միավոր 23 տեսակի զինատեսակ։
Նշվում է, որ օդի ջերմաստիճանը վերջին օրերին զրոյից ցածր է, սակայն դա խոչընդոտ չէ զորավարժությունների մասնակիցների համար, ովքեր տարբեր գործողություններ ու մանևրներ են իրականացնում։
Ռազմաօդային ուժերի մայոր Ահմեդ Ադիյամանը 14-րդ մոտոհրաձգային բրիգադի շտաբում կայացած ճեպազրույցում լրագրողներին պատմել է զորավարժությունների ընթացքի մասին։ Լրագրողները տեղեկացվել են նաև Ադրբեջանի, Իտալիայի և Կոսովոյի զինծառայողների կողմից գործողությունների ժամանակ օգտագործվող տեխնիկայի մասին։
Գործողության հաջորդ փուլում մշակվել է ձնահյուսի մեջ հայտնված մարդկանց որոնելու և փրկելու սցենար։
