Ռուսաստանը կշարունակի աշխատել հայ-ադրբեջանական հարաբերությունների կարգավորման ուղղությամբ՝ ի շահ Հարավային Կովկասում խաղաղության հաստատման։ Այս մասին իր ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Մենք կարևոր ենք համարում զերծ մնալ սադրիչ հռետորաբանությունից, որը կարող է հանգեցնել տարածաշրջանում իրավիճակի սրմանը», - ասել է Զախարովան՝ պատասխանելով Բաքվի կողմից հայկական դիրքերի և Արցախի խաղաղ բնակչության գնդակոծմանը Մոսկվայի վերաբերմունքի մասին հարցին։
Նա հիշեցրել է, որ Մոսկվան ելնում է Ռուսաստանի, Ադրբեջանի և Հայաստանի ղեկավարների բոլոր եռակողմ հայտարարությունների դրույթները խստորեն իրականացնելու անհրաժեշտությունից, ներառյալ հոկտեմբերի 31-ին Սոչիի գագաթնաժողովի պայմանավորվածությունները ուժի չկիրառման կամ դրա սպառնալիքի մասին։
Անդրադառնալով Դաշնային խորհրդի փոխխոսնակ Կոնստանտին Կոսաչովի հայտարարություններին, թե Հայաստանի և Ադրբեջանի միջև հակամարտությունը «չի մտնում ՀԱՊԿ-ի իրավասության մեջ», Զախարովան նշել է, որ փորձագետներն ու քաղաքական գործիչները իրավունք ունեն արտահայտելու իրենց տեսակետը։
«Կամ մենք ելնում ենք նրանից, որ մենք ժողովրդավարական հասարակություններ ենք, և փորձագետները, քաղաքական գործիչները և քաղաքագետներն իրավունք ունեն իրենց փորձագիտական տեսակետն արտահայտել տարբեր իրադարձությունների վերաբերյալ, կամ շեղվում ենք այս սկզբունքից»,- ասել է ՌԴ ԱԳՆ պաշտոնական ներկայացուցիչը։
Նա նաև ընդգծեց, որ տարբեր քաղաքական գնահատականներ են հնչում նաև հայկական լրատվամիջոցներում «բոլոր տեսակի իրադարձությունների նախօրեին, ընթացքում և անմիջապես հետո»։
Պատասխանելով հարցին, թե ինչպես է Կրեմլը մտադիր փոխզիջում գտնել Հայաստանի և Ադրբեջանի միջև, Զախարովան ասել է, որ «խաղաղության պայմանագրի թեման և հայ-ադրբեջանական հարաբերությունների կարգավորման այլ հարցեր զգայուն են»։
«Մենք տեղին չենք համարում մեկնաբանել կողմերի դիրքորոշումները՝ նախքան կոնկրետ պայմանավորվածություններ ձեռք բերելը»,- ընդգծեց նա։
Զախարովան հավելել է, որ ԵԱՀԿ Մինսկի խմբի ռուսաստանցի համանախագահը և հայ-ադրբեջանական հարաբերությունների կարգավորման հարցերով ՌԴ ԱԳ նախարարի հատուկ ներկայացուցիչ Իգոր Խովաևը Երևան և Բաքու կատարած այցերի ընթացքում քննարկում են խաղաղության պայմանագրի հարցերը։
Ավելի վաղ ՌԴ ԱԳՆ պաշտոնական ներկայացուցիչը հայտնել էր, որ Վաշինգտոնում Հայաստանի և Ադրբեջանի ԱԳ նախարարների քննարկումն անցկացվել է, այդ թվում՝ հաշվի առնելով Սոչիի գագաթնաժողովի արդյունքները։
