Թեղուտի պղինձ-մոլիբդենային հանքավայրն անցել է ամերիկյան ընկերության, որը ղեկավարում է Հայաստանով անցնող TRIPP տրանսպորտային երթուղու (Trump Route for International Peace and Prosperity-«Թրամփի երթուղի միջազգային խաղաղության և բարօրության համար») շրջանակներում ստեղծված TRIPP+ Enterprise Fund-ի տնօրեն Կոնստանտին Սոկոլովը, գրում է Ազատությունը։
ԶԼՄ-ն նշել է, որ այդ մասին է վկայում Տեխասի հարկային ռեգիստրից ստացած փաստաթուղթը, որով Թեղուտի հանքավայրը շահագործող «Կուպրար ՌԱ»-ի նոր բաժնետեր «Դայնեմիք ֆրոնտիեր հոլդինգս» ընկերությունը ղեկավարում է Ֆլորիդայում գրանցված Սոկոլովը։
Նշվում է, որ ընկերությունը ՀՀ-ում գրանցված չէ, հիմնադրվել է 2025-ի օգոստոսին՝ ԱՄՆ Տեխաս նահանգում։
ԶԼՄ-ն հիշեցրել է ապրիլին ստացած տեղեկությունը, ըստ որի՝ Սոկոլովը հետաքրքրված էր վարկային պարտքի դիմաց ռուսական ՎՏԲ բանկին անցած հանքի ձեռքբերմամբ։
Ազատությունը հիշեցրել է ապրիլին ՎՏԲ բանկի ղեկավար Անդրեյ Կոստինը հայտարարությունը, ըստ որի՝ բանկը Հայաստանում պղնձի արտադրության հետ կապված ակտիվի վաճառքի եզրափակիչ փուլում էր։
Նշվում է, որ դրանից հետո Մրցակցության և սպառողների շահերի պաշտպանության հանձնաժողովը թույլատրել էր «Կուպրար ՌԱ» ընկերությանը ձեռք բերել Թեղուտի բաժնետոմսերը։ Լրատվամիջոցի տեղեկություններով՝ բանկային համակարգի նախկին ներկայացուցիչ Սերգեյ Վիրաբյանը ստանձնել էր ՎՏԲ-ի հանդեպ ունեցած պարտքը, ստացել ընկերության նկատմամբ վերահսկողությունը, ապա այն վաճառել երրորդ կողմին։ Նման սխեման թույլ է տվել խուսափել արևմտյան պատժամիջոցների տակ գտնվող ռուսական բանկի հետ ուղղակի գործարքից։
Հուլիսի 15-ին հայտնի դարձավ, որ Չիկագոյում բնակվող ազգությամբ ռուս ներդրող Սոկոլովը կղեկավարի ԱՄՆ պետդեպարտամենտի TRIPP+ հիմնադրամը։ Նա կառավարելու է Հարավային Կովկասով և Կենտրոնական Ասիայով առևտրային միջանցքի զարգացման համար հատկացված ավելի քան 200 միլիոն դոլարը, այդ թվում՝ Հայաստանում կատարված ներդրումները։
ԱՄՆ պետդեպարտամենտի կողմից ստեղծված 201 մլն դոլար բյուջեով TRIPP+ հիմնադրամը ֆինանսավորելու է տրանսպորտի, էներգետիկայի և կրիտիկական նշանակության օգտակար հանածոների ոլորտների նախագծերը Հարավային Կովկասում և Կենտրոնական Ասիայում։
Վաշինգտոնում 2025 թվականի օգոստոսի 8-ին Հայաստանի, ԱՄՆ-ի և Ադրբեջանի ղեկավարներն ստորագրել էին համատեղ հռչակագիր, որը նախատեսում է Հայաստանի տարածքով Ադրբեջանը Նախիջևանին կապող TRIPP տարանցիկ երթուղու ստեղծումը՝ պետությունների ինքնիշխանության, տարածքային ամբողջականության և իրավազորության պահպանմամբ։
Հայաստանն ու ԱՄՆ-ն 2026 թվականի հունվարի 14-ին հրապարակել էին նախագծի իրականացման շրջանակը, իսկ հունիսի 4-ին՝ ստորագրել շրջանակային համաձայնագիր։ Փաստաթղթով նախատեսվում է ստեղծել TRIPP-ի զարգացման ընկերություն, որի 74%-ը կպատկանի ԱՄՆ-ի ստեղծած կառույցին, 26%-ը՝ Հայաստանին։ Սահմանային և մաքսային վերահսկողությունը, իրավապահ գործունեությունն ու անվտանգությունը կմնան ՀՀ պետական մարմինների պատասխանատվության ներքո։
