Կալանքի տակ գտնվող «Մայր Հայաստան» կուսակցության նախագահ, ԲՀԿ համամասնական ցուցակի 2-րդ համար Անդրանիկ Թևանյանը հայց է ներկայացրել ընդդեմ Ազգային ժողովի նախագահ Ալեն Սիմոնյանի, հայտնում է կուսակցության մամուլի ծառայությունը։
Թևանյանը պահանջում է պարտավորեցնել Սիմոնյանին հերքել իր դեմ տարածված՝ զրպարտություն համարվող փաստացի տվյալները։ Հերքումը պահանջվում է հրապարակել Հայաստանի Հանրային հեռուստաընկերության եթերով, Հանրային հեռուստաընկերության պաշտոնական կայքէջով, «Առաջին լրատվական ալիք» կայքէջով և «Լուրեր» YouTube ալիքով՝ «Լուրեր»-ի գլխավոր թողարկման ընթացքում՝ գրավոր և բանավոր տեսագրության ձևով՝ չզիջելով հրապարակված տեղեկատվությանը՝ հրապարակման ժամանակի, ձևավորման և նյութի ներկայացման կարևորության առումով։
Հերքման տեքստով Սիմոնյանը պետք է հայտարարի, որ հունիսի 1-ին տեղի ունեցած «Հայաստանն ընտրում է» նախընտրական բանավեճի ընթացքում Թևանյանի՝ «լրտես» լինելու վերաբերյալ իր հրապարակած տվյալները չեն համապատասխանում իրականությանը և սուտ են։ Հայցադիմումով նաև պահանջվում է Սիմոնյանից հօգուտ Թևանյանի բռնագանձել 6 000 000 դրամ՝ որպես զրպարտությամբ պատճառված վնասի փոխհատուցում։
Բացի այդ, հայցադիմումով պահանջվում է պարտավորեցնել Սիմոնյանին դատարանի վճիռն օրինական ուժի մեջ մտնելուց հետո 5 աշխատանքային օրվա ընթացքում հրապարակայնորեն ներողություն խնդրել Թևանյանից՝ նույն լրատվամիջոցներով և նույն պայմաններով։
Հայցադիմումով պահանջվում է նաև Սիմոնյանից հօգուտ Թևանյանի բռնագանձել 3 000 000 դրամ՝ որպես վիրավորանքի արդյունքում պատճառված վնասի փոխհատուցում, ինչպես նաև՝ հայցվորի կատարած և կատարվելիք դատական ծախսերը, այդ թվում՝ 310 000 դրամ պետական տուրքի գումարը և փաստաբանի խելամիտ վարձատրության գումարը։
Թևանյանի նկատմամբ գործողություններն սկսվել էին ՀՀ վարչապետ Նիկոլ Փաշինյանի՝ նրա դեմ պետական դավաճանության հոդվածով քրեական գործ հարուցելու մասին արված հայտարարությունից մեկ օր անց։ Քննչական կոմիտեն մայիսի 21-ին հայտնել էր Թևանյանի նկատմամբ պետական դավաճանության և լրտեսության փաստով քրվարույթ նախաձեռնելու մասին, մայիսի 23-ին վերջինս երկու ամսով կալանավորվել էր։
Փաստաբան Արամ Օրբելյանը նշել էր, որ Թևանյանի դեմ առաջադրված մեղադրանքում պետական գաղտնիք հավաքելու կամ փոխանցելու դրվագ չկա։
