Վենեսուելայում երկու հզոր երկրաշարժերի հետևանքով զոհերի թիվը հասել է մոտ 235-ի, ավելի քան 4300 մարդ վիրավորվել է, հայտնում է Associated Press-ը՝ հղում անելով երկրի իշխանություններին։
Reuters-ի փոխանցմամբ՝ երկրաշարժերը վնասել կամ ավերել են առնվազն 250 շենք։ Վնասված շինությունների թվում են առնվազն ութ հիվանդանոց, Վենեսուելայի Կարմիր խաչի կենտրոնակայանը և Ֆրանսիայի դեսպանատան շենքը։
Լուրջ վնասներ է կրել Լա Գուայրայի նահանգը, որը սահմանակից է Կարակասին և որտեղ գտնվում է մայրաքաղաքի գլխավոր օդանավակայանը։ Վենեսուելայի իշխանությունները շրջանը որակել են աղետի գոտի։ Կարակասի օդանավակայանը վնասների պատճառով փակվել է։
Լա Գուայրայի որոշ հատվածներում էլեկտրամատակարարումը սահմանափակ է։ Փրկարարներն ու կամավորները գիշերվա ընթացքում շարունակել են որոնումները փլուզված շենքերի տարածքում, իսկ իշխանությունները մասնավոր ընկերությունների հետ աշխատել են ծանր տեխնիկա ներգրավելու ուղղությամբ։
Կարաբոբո նահանգի Մորոն քաղաքում՝ երկրաշարժերի էպիկենտրոնի մոտ, տներ են փլուզվել, բնակիչները մնացել են առանց ջրի և էլեկտրականության։ Reuters-ի տվյալներով՝ վնասված բնակելի համալիրում ապրող շուրջ 200 ընտանիք փորձել է դուրս բերել իրերը, իսկ նրանց մի մասը սպասել է ապաստարանների բացմանը։
Միևնույն ժամանակ Reuters-ը նշում է, որ Վենեսուելայի նավթային ենթակառուցվածքները հիմնականում չեն տուժել, և օտարերկրյա էներգետիկ ընկերությունները լուրջ խափանումների մասին չեն հայտնել։
Հունիսի 25-ին Վենեսուելայում տեղի էին ունեցել 7,2 և 7,5 մագնիտուդով երկրաշարժեր։ Ամենաշատը տուժել էին Կարակասի մերձակայքի շրջանները և Լա Գուայրայի ափամերձ նահանգը։ Մեծի Տանն Կիլիկիո կաթողիկոսության տվյալներով՝ Վենեսուելայի երկրաշարժից հետո կան անհետ կորած և վիրավոր հայեր, քանդվել է նաև երկու հայ ընտանիքի տուն։
