Գյումրու քաղաքապետ Վարդան Ղուկասյանին 2025 թվականի հոկտեմբերին կալանավորվելուց ի վեր չորրորդ մեղադրանքն է առաջադրվել, հայտնել է ՀՀ քննչական կոմիտեն։
Ըստ ՔԿ-ի՝ Ղուկասյանի նկատմամբ հարուցվել է նոր հանրային քրեական հետապնդում՝ պաշտոնատար անձի օրինական ծառայողական գործունեությանը միջամտելու մեղադրանքով։
Քննչական կոմիտեի վարկածով՝ մայիսի 27-ին ՀՀ հակակոռուպցիոն քրեական դատարանում կայացած նիստից հետո Ղուկասյանը փորձել է պատասխանել լրագրողների հարցերին, սակայն հրաժարվել է կատարել իրեն ուղեկցող ոստիկանի՝ կալանավորվածների համար նախատեսված խուց տեղափոխվելու օրինական պահանջը։
Գերատեսչության պնդմամբ՝ երբ ոստիկանը փորձել է ուղեկցել նրան, Ղուկասյանը ֆիզիկական ներգործություն է գործադրել ոստիկանի նկատմամբ՝ խոչընդոտելով նրա ծառայողական պարտականությունների կատարմանը։
Հունիսի 25-ին քննիչի միջնորդության հիման վրա հսկող դատախազը Ղուկասյանի նկատմամբ հանրային քրեական հետապնդում է հարուցել ՀՀ քրեական օրենսգրքի 452-րդ հոդվածի 3-րդ մասով (պաշտոնատար անձի օրինական ծառայողական գործունեությանը միջամտելը), որը նախատեսում է 2-5 տարվա ազատազրկում։
Ղուկասյանը կալանավորվել էր 2025 թվականի հոկտեմբերին՝ կաշառք պահանջելու մեղադրանքով։ Ավելի ուշ նրան մեղադրանք էր առաջադրվել նաև «ՀՀ ինքնիշխանությունից հրաժարվելուն հրապարակային կոչեր անելու» համար, այդ հոդվածով քրհետապնդումը դադարեցվել էր 2025-ի դեկտեմբերին։
2025-ին նրա նկատմամբ նոր քրեական հետապնդում էր հարուցվել՝ խուլիգանության հատկանիշներով։ 2026-ի հունիսի 5-ին Ղուկասյանի նկատմամբ քրեական վարույթ էր նախաձեռնվել իշխանության յուրացման ենթադրյալ փորձի մեղադրանքով։
