Սահմանադրական դատարանը մասնակի բավարարել է «Ուժեղ Հայաստան» դաշինքի միջնորդությունը և Կենտրոնական ընտրական հանձնաժողովից ու Ներքին գործերի նախարարությունից պահանջել է ներկայացնել տվյալներ հունիսի 7-ի ԱԺ ընտրությունների վերաբերյալ, տեղեկանում ենք ՍԴ կայքից։
Ըստ ՍԴ հաղորդագրության՝ «Ուժեղ Հայաստանը» հունիսի 22-ին դատարան էր մուտքագրել միջնորդություն-առաջարկություն` տեղեկություններ և նյութեր պահանջելու մասին։
ՍԴ-ն մինչև հունիսի 24-ը պարտավորեցրել է ներկայացնել ամբողջական տեղեկություններ այն 16 738 ընտրողի մասին, որոնց տվյալներն ու քվեարկության վայրը պահվել են գաղտնի, ինչպես նաև պարզաբանել, թե ի՞նչ վերահսկողական մեխանիզմներ են գործել՝ բացառելու նրանց կողմից կրկնակի կամ բազմակի քվեարկության հնարավորությունը։
Դատարանը պահանջել է նաև պարզաբանումներ 79 125 դեպքի վերաբերյալ, երբ ընտրողների տվյալները համակարգ են մուտքագրվել ձեռքով։ ՍԴ-ն հետաքրքրվել է, թե ինչո՞ւ է կիրառվել տվյալների ձեռքով ներմուծումը, ի՞նչ փաստաթղթերի հիման վրա է այն կատարվել, արդյոք ապահովվե՞լ է ընտրողների պատշաճ նույնականացումը և ի՞նչ մեխանիզմներ են գործել՝ բացառելու կրկնակի կամ ոչ իրավաչափ քվեարկության ռիսկերը։
Կենտրոնական ընտրական հանձնաժողովի վերջնական արդյունքներով՝ 18 քաղաքական ուժից ԱԺ է անցել «Քաղաքացիական պայմանագիրը» (64 մանդատ), «Ուժեղ Հայաստանը» (29 մանդատ), «Հայաստան» կուսակցությունների դաշինքը (12 մանդատ):
Խորհրդարանական ընտրություններին մասնակցած 18 քաղաքական ուժերից 7-ը հունիսի 19-ին վիճարկել էին քվեարկության արդյունքները ՍԴ-ում՝ պահանջելով դրանք անվավեր ճանաչել։ Որպես այլընտրանք՝ առաջարկվել է անցկացնել երկրորդ փուլ, կրկնակի քվեարկություն կամ էլ մանդատների բաշխման այլ կարգ կիրառելու առաջարկներ։ ՍԴ-ն ավելի ուշ միավորել էր ընտրությունները վիճարկելու վերաբերյալ 7 քաղաքական ուժերի դիմումը։ «Ուժեղ Հայաստանի» դիմումը քննվել է միավորված գործի շրջանակում։
