Հայաստանը հաստատել է մասնակցությունը «Մանկական Եվրատեսիլ 2026» երգի մրցույթին, որը հոկտեմբերին կանցկացվի Մալթայում, հայտնում է Հայաստանի Հանրային հեռուստաընկերությունը։
Հանրային հեռուստաընկերությունն սկսել է մրցույթում Հայաստանը ներկայացնող մասնակցի ընտրության գործընթացը։ Հայտերը բաց են մինչև հունիսի 30-ը։ Մասնակցության համար դիմողները պետք է լինեն ՀՀ քաղաքացի կամ բնակվեն երկրում և ծնված լինեն 2011 թվականի հոկտեմբերի 25-ից մինչև 2017 թվականի հոկտեմբերի 24-ը։
Դիմել կարող են անհատ կատարողներ, դուետներ, ինչպես նաև մինչև 6 անձից կազմված խմբեր։ Նախնական փուլից հետո ընտրված մասնակիցները կհրավիրվեն լսումների, որոնք կանցկացվեն Երևանում՝ հուլիսի սկզբին։ Լսումների ժամանակ երգիչները պետք է կատարեն իրենց ընտրությամբ երկու հայտնի երգի քավեր տարբերակ։
Մրցույթի մասնակցին կընտրի պրոֆեսիոնալ ժյուրին, իսկ «Մանկական Եվրատեսիլ»-ի համար երգը Հանրային հեռուստաընկերությունը կընտրի ներքին կարգով։
«Մանկական Եվրատեսիլ 2026»-ին կմասնակցեն Ալբանիան, Հայաստանը, Կիպրոսը, Ֆրանսիան, Վրաստանը, Իռլանդիան, Իտալիան, հյուրընկալող Մալթան, Նիդերլանդները, Հյուսիսային Մակեդոնիան, Լեհաստանը, Պորտուգալիան և Ուկրաինան։
Հայաստանը «Մանկական Եվրատեսիլ»-ին առաջին անգամ մասնակցել էր 2007 թվականին և «Արևիկ» խմբի «Երազանք» երգով զբաղեցրել երկրորդ տեղը։ Հայաստանը մրցույթում հաղթել է 2 անգամ՝ 2010 թվականին Վլադիմիր Արզումանյանի «Մամա» երգով և 2021 թվականին՝ Մալենայի «Քամի, քամի» երգով։ Մալենայի հաղթանակից հետո Հայաստանը 2022 թվականին երկրորդ անգամ հյուրընկալել էր «Մանկական Եվրատեսիլ»-ը Երևանում։
2025 թվականին Հայաստանը ներկայացրել էր Ալբերտ Արմենակյանը՝ Albert բեմական անունով։ Նա Brave Heart երգով զբաղեցրել էր 4-րդ տեղը՝ ստանալով 175 միավոր, որից 117-ը՝ ժյուրիից, 58-ը՝ առցանց քվեարկությամբ։
