«Անդրեասյան եղբայրների կինոընկերությունը», «Սոլնցե» հեռուստաալիքը և Okko առցանց կինոթատրոնը հայտարարել են Նարինե Աբգարյանի համանուն վիպակի հիման վրա «Մանյունյա. Բայի մանկությունը» ֆիլմի արտադրության մեկնարկի մասին։ Լիամետրաժ կինոնկարի նկարահանումները կտևեն մի քանի ամիս, իսկ պրեմիերան նախատեսված է 2027 թվականի մայիսի 20-ին։
Ըստ սյուժեի՝ իրենց հարազատ Բերդ գյուղը քաղաքի վերածելու համար Ռոզան և նրա հայրը խորամանկության են դիմում: Սակայն նոր կարգավիճակի հետ մեկտեղ բնակավայրում սկսվում են մեծ փոփոխություններ, հայտնվում են դժգոհ բնակիչներ և խիստ ղեկավար: Երբ մանկական չարաճճիության պատճառով ամեն ինչ դուրս է գալիս վերահսկողությունից, Ռոզան ստիպված է լինում փրկել ոչ միայն հորը, այլև Բերդի ապագան:
Ֆիլմը կդառնա համանուն սերիալի շարունակությունը։ Գլխավոր դերերում հանդես կգան Ալինա Խադարցևան, Մարինա Հովսեփյանը և Վովա Հարությունյանը։ Պրոդյուսերներն Անդրեասյան եղբայրներն են, ռեժիսորն՝ Արման Մարությանը։
Սարիկ Անդրեասյանը՝ «Անդրեասյան եղբայրների կինոընկերության» համահիմնադիրը, նաև 2016 թվականի «Երկրաշարժ» ֆիլմի ռեժիսորն է, որը ցուցադրվել է մի շարք երկրներում և Սանկտ Պետերբուրգում կայացած «Վիվատ, Ռուսաստանի կինո» XXV փառատոնում արժանացել է մրցանակի՝ լավագույն օպերատորական աշխատանքի համար։
Կարդացեք նաև՝
«Առաջիններից մեկը կլինի». Սարիկ Անդրեասյանը խոսել է հայ երաժիշտներին նվիրված ֆիլմի մասին
