Թուրքիայի նախագահ Ռեջեթ Թայիփ Էրդողանը և Պակիստանի վարչապետ Մուհամմադ Շեհբազ Շարիֆը շնորհավորել են վարչապետ Նիկոլ Փաշինյանին՝ խորհրդարանական ընտրություններում «Քաղաքացիական պայմանագիր» կուսակցության հաղթանակի առթիվ:
Էրդողանը հույս է հայտնել, որ տարածաշրջանում խաղաղության հաստատելու Փաշինյանի «տեսլականը հաջողությամբ ավարտին կհասցվի»։
«Ես լիովին հավատացած եմ, որ տարածաշրջանում երկարատև խաղաղության և կայունության հաստատման և այդ ուղղությամբ անհրաժեշտ համագործակցության ապահովման վերաբերյալ Ձեր ռազմավարական տեսլականը հաջողությամբ ավարտին կհասցվի»,- նշված է նրա ուղերձում:
Թուրքիայի նախագահը Փաշինյանին նաև «առողջություն և բարեկեցություն» է մաղթել, իսկ Հայաստանի ժողովրդին՝ «բարգավաճում և երջանկություն»։
Պակիստանի ղեկավարը նշել է, որ Փաշինյանից ակնկալում է համագործակցություն՝ Պակիստան-Հայաստան հարաբերություններն ամրապնդելու համար և կառուցողական համագործակցությանն Ադրբեջանի և Հայաստանի միջև։
2025 թվականի օգոստոսի 31-ից Պակիստանը ճանաչում է Հայաստանը. երկրները պաշտոնապես հաստատել են դիվանագիտական հարաբերություններ։ Մինչ այդ Պակիստանը ՄԱԿ-ի անդամ միակ պետությունն էր, որն ավելի քան 30 տարի չէր ճանաչում Հայաստանի անկախությունը։
Հունիսի 7-ին ՀՀ-ում անցկացվել են Ազգային ժողովի ընտրություններ, որին մասնակցել է 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել է 1 477 736-ը (58,94%)։ Նախնական տվյալներով՝ անցողիկ շեմը հաղթահարել է քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
«Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ է պահանջել։ Հունիսի 9-ին շուրջ 50 ընտրատեղամասում վերահաշվարկի դիմում էր ներկայացրել նաև «Ուժեղ Հայաստանը»։ «Հայաստան» դաշինքը վերջնական արդյունքների հրապարակումից հետո կդիմի Սահմանադրական դատարան։
Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։
