Գորիսի քաղաքապետ Առուշ Առուշանյանն աշխատանքից ազատել է մի շարք ենթակաների, որոնք չեն կարողացել ապահովել «Քաղաքացիական պայմանագիր» կուսակցության հաղթանակը ընտրություններում, հայտնել է «Հրապարակ» թերթը։
Օրաթերթի տվյալներով՝ աշխատանքից զրկվել են քաղաքապետի տեղակալ Արտյոմ Աղաջանյանը, խորհրդական Կարեն Ջավահիրյանը, օգնականը և Խնձորեսկի վարչական ղեկավարը։
Աղբյուրները նշում են, որ Առուշանյանը տեղամասերում նշանակել էր պատասխանատուներ, որոնք վստահեցրել էին, թե իշխող կուսակցությունը բարձր արդյունքներ է գրանցելու, սակայն ընտրությունների քվեարկության պատկերը մեծ անակնկալ է դարձել։
Թերթի տեղեկություններով՝ կադրային հեռացումները կրելու են շարունակական բնույթ, և քաղաքապետը մտադիր է պատժել բոլոր նրանց, ովքեր թերի են կատարել իրենց առջև դրված խնդիրը։
Նախընտրական քարոզարշավի ընթացքում, ըստ ԶԼՄ-երի, «Քաղաքացիական պայմանագիրը» դժգոհ էր վերադարձել Սյունիք կատարած այցից, քանի որ այդքան էլ դրական ընդունելության չէր արժանացել։ Տեղեկություններ էին շրջանառվում, որ հենց Առուշանյանն է մեծ աշխատանք տարել Սյունիքում կայացած հանրահավաքների ներկայացվածության համար, ումից Նիկոլ Փաշինյանն ամենագոհն է եղել։
Հունիսի 7-ին Հայաստանում անցկացվել էին ԱԺ ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%): Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
ԲՀԿ-ն, որը նախնական արդյունքով չի հաղթահարել անցողիկ 4%-ի շեմը, վերահաշվարկ էր պահանջել։ Նման պահանջներով հանդես են եկել «Ուժեղ Հայաստան», «Հայաստան» դաշինքները և «Բարգավաճ Հայաստան» կուսակցությունը։ Զանգվածային խախտումների մասին հայտարարել են նաև «Միասնության թևեր», «Բոլորին դեմ» կուսակցությունները։
