Միացյալ Արաբական Էմիրությունները (ԱՄԷ) պատերազմի առաջին օրերից և ապրիլին հայտարարված զինադադարից հետո ամբողջ օրվա ընթացքում տասնյակ ավիահարվածներ է հասցրել Իրանին, հայտնել է ՌԲԿ-ն՝ հղում անելով The Wall Street Journal-ի աղբյուրներին։
Աղբյուրների փոխանցմամբ՝ գրոհները համակարգվել են ԱՄՆ-ի և Իսրայելի հետ, որոնք տրամադրել են հետախուզական տվյալներ։ Թիրախների թվում էին Հորմուզի նեղուցում գտնվող Քեշմ և Աբու Մուսա կղզիները, Բենդեր Աբաս քաղաքը, Պարսից ծոցի Լավան կղզու նավթավերամշակման գործարանը և Ասալույեի նավթաքիմիական համալիրը։
Այս հարվածների մի մասն ուղղված էր իրանական էներգետիկ օբյեկտներին՝ ի պատասխան ԱՄԷ-ի նավթագազային ենթակառուցվածքների վրա Թեհրանի հարձակումների։ Իսրայելի հետ համատեղ Ասալույեին հասցված հարվածը դրդել է ԱՄՆ-ին դիմել իսրայելական կողմին՝ խնդրելով դադարեցնել էներգետիկ օբյեկտների հրետակոծությունը։
Ապրիլի սկզբին Սաուդյան Արաբիան բողոքել էր Միացյալ Նահանգներին, որ ԱՄԷ-ի հարձակումները մեծացնում են Իրանի կողմից տարածաշրջանի էներգետիկ ենթակառուցվածքների հրետակոծման ռիսկը, ինչը կարող է հանգեցնել նավթի գների կտրուկ աճի և ցնցել համաշխարհային շուկաները։ Էր Ռիադը ցանկանում էր, որ Վաշինգտոնը ճնշում գործադրի Աբու Դաբիի վրա։
Պարսից ծոցի երկրների պաշտոնյաների խոսքով՝ ԱՄԷ նախագահ շեյխ Մուհամմեդ բեն Զաիդը դժգոհ է մնացել Սաուդյան Արաբիայի գահաժառանգ արքայազն Մուհամմեդ բեն Սալմանի գործողություններից, երբ վերջինս հրաժարվել է մասնակցել Իրանի դեմ համակարգված ռազմական գործողություններին։
Այնուամենայնիվ, վերջին շրջանում ԱՄԷ-ն ավելի զիջողական դիրք է գրավել՝ պնդելով հակամարտության դիվանագիտական լուծումների անհրաժեշտությունը, որը վտանգի տակ է դրել իր էներգետիկ օբյեկտները։ Երկրի նախագահն այն առաջնորդների թվում էր, որոնք մայիսի սկզբին կայացած հեռախոսազրույցի ընթացքում կոչ էին արել Սպիտակ տան ղեկավար Դոնալդ Թրամփին խաղաղության պայմանագիր կնքել Իրանի հետ։
Մայիսին WSJ-ն արդեն հայտնել էր Իրանի Լավան կղզու նավթավերամշակման գործարանին ԱՄԷ-ի հասցրած գաղտնի հարվածների մասին։ Այնտեղ խոշոր հրդեհ էր բռնկվել, ինչի հետևանքով հզորությունների մեծ մասը մի քանի ամսով շարքից դուրս էր եկել։ Թեհրանն այն ժամանակ հայտարարել էր, որ գործարանը հարձակման է ենթարկվել թշնամու կողմից։ Ի պատասխան՝ հրթիռներով ու անօդաչուներով հարվածներ էր հասցվել ԱՄԷ-ին ու Քուվեյթին։ Իրանը նախազգուշացրել էր «կործանարար պատասխանի» մասին՝ ԱՄԷ-ի ցանկացած գործողության դեպքում։
Ընդհանուր առմամբ՝ Իրանն Էմիրությունների ուղղությամբ արձակել է ավելի քան 2800 հրթիռ և անօդաչու սարք, ինչը շատ ավելին է, քան ցանկացած այլ երկրի, այդ թվում՝ Իսրայելի ուղղությամբ։
