ԱՄՆ-ի և Իրանի միջև բանակցությունների երկրորդ փուլը կարող է կայանալ արդեն առաջիկա հինգշաբթի՝ ապրիլի 16-ին, Fox News հեռուստաալիքին տված հարցազրույցում հայտարարել է ԱՄՆ փոխնախագահ Ջեյ Դի Վենսը։
Որպես հանդիպման հավանական հարթակներ դիտարկվում են Ժնևը և Իսլամաբադը, սակայն նոր բանակցությունների հստակ ժամկետներն ու վայրը դեռևս վերջնականապես որոշված չեն։
Վենսի խոսքով՝ Վաշինգտոնը հասել է Իրանի հետ կապված իր բոլոր նպատակներին և կարող է անցնել հակամարտության հանգուցալուծմանը։ ԱՄՆ փոխնախագահը շեշտել է, որ Սպիտակ տունը նախընտրում է հարցը փակել հաջողված բանակցությունների միջոցով։
«Այս բանակցությունների ընթացքում որոշակի պատկերացում կազմեցինք, թե ինչպես են իրանցիները վարում երկխոսությունը։ Հենց այդ պատճառով լքեցինք Պակիստանը. մենք հասկացանք, որ նրանց թիմն ի վիճակի չէր գործարք կնքել։ Նրանք ստիպված էին վերադառնալ Թեհրան՝ Գերագույն առաջնորդից կամ մեկ այլ պաշտոնյայից մեր առաջարկած պայմանների վերաբերյալ համաձայնություն ստանալու համար։ Այնպես որ, անկախ նրանից՝ կլինե՞ն հետագա բանակցություններ, թե՞ ոչ, գնդակն Իրանի դաշտում է, քանի որ շատ բան ենք առաջարկել և հստակ գծել ենք մեր «կարմիր գծերը»»,- հայտարարել է Վենսը։
ԱՄՆ փոխնախագահը նաև ընդգծել է, որ Վաշինգտոնի առանցքային պահանջներից մեկն Իրանից միջուկային նյութի դուրսբերումն է։ Չնայած ամերիկյան կողմը պատրաստ է որոշակի զիջումների՝ կողմերի միջև դեռևս առկա են լուրջ տարաձայնություններ ուրանի հարստացման ժամկետների վերաբերյալ։
Իսլամաբադում կայացած նախորդ հանդիպման ժամանակ Թեհրանն առաջարկել էր հինգ տարով կասեցնել ուրանի հարստացումը, սակայն Միացյալ Նահանգները շարունակում է պնդել 20 տարի ժամկետ։
Ապրիլի 11-ին Իսլամաբադում ավարտվել էին ԱՄՆ-Իրան բանակցությունները հակամարտության կարգավորման շուրջ։ Դրանք տևել էին 21 ժամ, սակայն կողմերը չէին կարողացել ընդհանուր համաձայնության գալ։ ԱՄՆ նախագահ Դոնալդ Թրամփը հայտարարել էր, որ հանդիպումը «լավ է անցել», և հարցերի մեծ մասի շուրջ համաձայնություն է ձեռք բերվել, միայն միջուկային հարցի շուրջ ընդհանուր հայտարարի չեն եկել, սակայն որոշ ժամանակ անց հայտարարել էր Հորմուզի նեղուցի շրջափակման մասին։
