ՀՀ-ում Իրանի դեսպան Խալիլ Շիրղոլամին հույս է հայտնել, որ վարչապետ Նիկոլ Փաշինյանի՝ 2026 թվականին Իրան նախատեսված այցի ընթացքում կստորագրվի Հայաստանի և Իրանի միջև ռազմավարական համագործակցության մասին փաստաթուղթ։
Իրանի Իսլամական հեղափոխության հաղթանակի 47-ամյա տարեդարձին նվիրված ընդունելության ժամանակ ելույթ ունենալով՝ դեսպանը նշել է, որ երկու երկրների միջև հարաբերությունները մտել են հասունացման փուլ, և կողմերը նախատեսում են ինստիտուցիոնալացնել հարաբերությունները համապարփակ ռազմավարական գործընկերության շրջանակներում։
Նա նաև ընդգծել է, որ նախորդ տարի երկու երկրների միջև հարաբերություններում գրանցվել են կարևոր նվաճումներ։ Մասնավորապես, նա շեշտել է պաշտոնյաների փոխադարձ այցերը, Իրանի նախագահ Մասուդ Փեզեշքիանի Երևան կատարած այցի ընթացքում համագործակցության 12 հուշագրերի ստորագրումը, ռազմավարական համագործակցության վերաբերյալ փաստաթղթի պատրաստումը, բարձր մակարդակի պաշտպանական հարաբերությունների զարգացումը, անվտանգության համագործակցության վերաբերյալ նոր փաստաթղթի մշակումը և այլն։
Դիվանագետի խոսքով՝ երկու երկրների միջև առևտրաշրջանառությունը, չհաշված պաշտպանության ոլորտը, 2025 թվականի առաջին 11 ամիսներին հասել է 698 մլն դոլարի: Շիրղոլամին նաև ասել է, որ Թեհրանը ողջունում է Հարավային Կովկասի տարածաշրջանում խաղաղության գործընթացը և կարևորում է հաղորդակցությունների զարգացումը և ապաշրջափակումը՝ տարածաշրջանի բոլոր երկրների տրանսպորտային և տարանցիկ հնարավորությունների օգտագործման շրջանակներում:
«Իրանն իր ռազմավարությամբ ցանկանում է տեսնել ուժեղ, զարգացած և բարգավաճ Հայաստան: Իրանի և Հայաստանի ժողովուրդների միջև բարեկամությունը, որը հիմնված է երկարատև ավանդույթների, պատմական, քաղաքակրթական և մշակութային կապերի վրա, ունի աճի, զարգացման, առաջընթացի, ավելի մեծ փոխկապակցվածության և գործընկերության հստակ ուղի»,- շարունակել է դիվանագետը:
Իրանի գերագույն առաջնորդ Ալի Խամենեիին ուղղված ուղերձում Փաշինյանն ընդգծել էր երկու երկրների միջև ռազմավարական հարաբերությունների խորացման կարևորությունը:
