Ադրբեջանից Վրաստանի տարածքով դեկտեմբերի 19-ին առաջին անգամ Հայաստան էր ժամանել նավթամթերքով բեռնված գնացքը:
Պետական եկամուտների կոմիտեից Armenia Today-ին հայտնել էին, որ ադրբեջանական բենզինը Հայաստան է ներմուծել երկու ընկերություն՝ «Մեգա Թրեյդ»-ը և «Շիշա ուորլդը»։
«Մեգա Թրեյդ» ՍՊԸ-ն կառավարում է Ran Oil ավտալցակայանների ցանցը, այն իշխանական պատգամավոր Խաչատուր Սուքիասյանի ընտանիքին պատկանող «Սիլ Կապիտալ»-ի կազմում է։ Երկրորդ ընկերությունը՝ «Շիշա ուորլդ»-ը, համաձայն իրավաբանական անձանց պետական ռեգիստրի, 100%-ով պատկանում է Սամվել Վահագնի Մկրտչյանին։ Վերջինս, ըստ լրատվամիջոցների, գործարար Սամվել Ալեքսանյանի կնոջ՝ Շողերինա Մկրտչյանի եղբորորդին է:
Ներմուծված վառելիքն արդեն մի քանի օր է, ինչ վաճառվում է Ran Oil ընկերության բենզալցակայաններում և, ըստ սպառողների ու շուկայի ներկայացուցիչների, առկա տեսականու համեմատ ավելի մատչելի գնով է առաջարկվում:
Armenia Today-ը հարցում է իրականացրել մայրաքաղաքում՝ հետաքրքրվելով՝ ինչպե՞ս են վերաբերվում ադրբեջանական բենզինից օգտվելուն, արդյոք արդեն օգտվե՞լ կամ պատրաստվո՞ւմ են օգտվել դրանից:
Նշենք, որ հարցվածների մի մասն իրենց դժգոհությունն է հայտնել՝ նշելով, որ դեմ են Հայաստանում ադրբեջանական բենզինի վաճառքին։
«Չեմ ուզում հայհոյել։ Ավելի լավ է ռուսական բենզին գնեմ, քան ադրբեջանական»,- ասել է քաղաքացիներից մեկը։
Հարցման մասնակից վարորդներից մեկն էլ, հարցին ի պատասխան, հայտնել է, որ «հայրենասիրությունը թույլ չի տա» դա անել։
Քաղաքացիների մի մասը ողջունել է Ադրբեջանի հետ առևտուր անելու Հայաստանի որոշումը։
«Ինձ համար տարբերություն չկա, ուզում է՝ Թուրքիայինը լինի, ուզում է՝ Հայաստանինը։ Բենզին լինի, քշենք, իսկ եթե էժան է, ավելի լավ»,- ասել է հարցված վարորդներից մեկը։
