Բյուրականի Սուրբ Հովհաննես եկեղեցու հոգևոր հովիվ Վրթանես քահանա Բաղալյանն ինտենսիվ թերապիայի բաժանմունքում է, նրա վիճակը կայուն է, գիտակից վիճակում է, հայտարարել է Հայոց եկեղեցու պահպանության համահայկական խորհուրդը։
Ըստ հայտարարության՝ «Մաստերմեդ» ԲԿ-ի բժշկական թիմն ակնկալում է բարենպաստ ընթացք և այլ միջամտությունների կարիք չի տեսնում։ Բժիշկների տեղեկացմամբ՝ բուժառուն տեղափոխվել է «սրտամկանի սուր ինֆարկտ, կարդիոգեն շոկ» ախտորոշմամբ։ Կատարվել են անհրաժեշտ ինտենսիվ թերապիայի միջամտություններ, կորոնարոգրաֆիա, և բժշկական ցուցումով իրականացվել է համապատասխան միջամտություն՝ ստենտավորում։
Ավելի ուշ քահանան News.am-ին ասել է, որ երբ մարդիկ փողոցային հայհոյանքներով փորձել են մուտք գործել Մայր տաճար, խփել դռանն ու հայհոյել, սիրտը կարծես պայթել է լկտի վիճակից։
«Փառք Աստծո, մերոնք դուռը բացեցին, մեր հավատացյալ ժողովուրդն ավելի շատ էր, իրենց հրեց, դուրս հանեց, չթողեց Մայր տաճար մուտք գործել»,- պատմել է նա։
Նա նշել է, որ ոստիկաններից մեկն իրեն մի կողմ է տարել, իսկ լրագրողներից մեկը շտապօգնություն է զանգահարել, ապա քահանաներն արագ հավաքվել են ու իրեն տարել հիվանդանոց։
Մայր Աթոռ Սուրբ Էջմիածնում դեկտեմբերի 18-ին վատթարացել էր Տեր Վրթանեսի ինքնազգացողությունը։ Հայր Զաքարիա վարդապետ Բաղումյանը հայտնել էր, որ Տեր Վրթանեսի համար որոշիչ են մոտակա 72 ժամերը։
Ամենայն Հայոց կաթողիկոս Գարեգին Երկրորդի կողմնակիցների և նրա հրաժարականը պահանջողների միջև հրմշտոցների ժամանակ վատացել էր նաև Armenia Today-ի թղթակից Անի Ներկարարյանի ինքնազգացողությունը։
Մայր Աթոռում նույն օրը տեղի էր ունեցել հավաք՝ ի աջակցություն կաթողիկոսի, զուգահեռաբար՝ այնտեղ էին հավաքվել նաև վեհափառի դեմ արտահայտվողները: Գարեգին Բ-ն Մայր Աթոռում ժամերգության ընթացքում նշել էր, որ եկեղեցում առկա խնդիրները պետք է լուծվեն կանոնական կարգով: Նա հորդորել էր եկեղեցում հավաք հրավիրած եպիսկոպոսներին վերադառնալ կանոնական դաշտ:
Ներկայումս Տեր Վրթանես քահանա Բաղալյանը գտնվում է ինտենսիվ թերապիայի բաժանմունքում, գիտակցության մեջ է, և վիճակը գնահատվում է կայուն։ Բժշկական թիմի գնահատմամբ՝ ակնկալվում է բարենպաստ ընթացք, և այս պահին այլ միջամտությունների կարիք չկա։
Տեսակցությունները ժամանակավորապես սահմանափակված են՝ հաշվի առնելով ինտենսիվ թերապիայի բաժանմունքի կարգը․ հիվանդասենյակ տեղափոխվելու դեպքում տեսակցությունները կկազմակերպվեն սահմանված ժամերին։
Խորհուրդը իր խորին երախտագիտությունն է հայտնում «Մաստերմեդ» ԲԿ-ի բժշկական թիմին՝ արագ և մասնագիտական աշխատանքի համար, և կոչ է անում հավատավոր մեր ժողովրդին՝ աղոթքով զորակցել Տեր Վրթանես քահանային՝ նրա շուտափույթ ապաքինման համար։
