Հայաստանի ֆուտբոլի ֆեդերացիան (ՀՖՖ) Հպարբերաբար մեծ ու փոքր խոչընդոտներ է ստեղծում hայ երկրպագուների՝ մասնավորապես կազմակերպված ֆան շարժումների համար, հայտնում է «Առաջին հայկական ճակատ» ֆան շարժումը։
Փետրվարի 1-ին կայանալիք ֆուտզալի Եվրոպայի 2026 թվականի առաջնության ընտրական փուլի Հայաստան-Ալբանիա հանդիպման տոմսերը դեռ չեն վաճառվում, նշել են երկրպագուները։
«Որևէ տեղեկություն չկա, թե երկրպագուները ինչպե՞ս կարող են ներկա գտնվել խաղին։ ՀՖՖ ղեկավարությունը պատրաստ է ֆուտզալի հավաքականին թողնել առանց կազմակերպված աջակցության՝ վախենալով, որ խաղին կարող են լինել բողոքի ակցիաներ»,- ասվում է հաղորդագրությունում։
Շարժումը ֆեդերացիայից պահանջում է սկսել Հայաստան-Ալբանիա խաղի տոմսերի բաց վաճառքը, որպեսզի բոլորը կարողանան աջակցել ընտրանուն։
Ստեղծված իրավիճակում երկրպագուները մեղադրում են ՀՖՖ նախագահ Արմեն Մելիքբեկյանին։ Շարժումը զգուշացրել է, որ այս քաղաքականության շարունակությունը կհանգեցնի նրան, որ Հայաստանի հավաքականը կխաղա առանց երկրպագուների, դատարկ կամ կիսադատարկ տրիբունաներում։
ՖԱՖ-ը հիշեցրել է, որ ֆեդերացիայի կողմից առաջին նման միջամտությունը տեղի էր ունեցել Ֆարերյան կղզիների հավաքականի հետ խաղից առաջ։ Այնուհետև մինչև վերջին օրերը FAF-ի և Red Eagles-ի ֆան շարժումներին հնարավորություն չէր տրվել ձեռք բերել իրենց ավանդական տրիբունաների տոմսերը։ Հետո Լատվիայի հետ խաղից առաջ ֆեդերացիան հրաժարվել էր հյուրերի սեկցիայից, ինչի պատճառով տասնյակ հայ երկրպագուներ, այդ թվում՝ Հայաստանից մեկնած FAF-ի անդամները, Ռիգայում ստիպված տոմսեր էին գնել լատվիացի երկրպագուների համար նախատեսված տեղերում։
Ըստ շարժման՝ նախորդ տարեվերջին Հայաստան-Դանիա հանդիպումն անցկացվել էր հանդիսատեսի համար ամենաանհարմար վայրում՝ Ֆուտբոլի ակադեմիայում, իսկ խաղի տոմսերը նույնիսկ չէին վաճառվել։ Իրենք կարողացել էին ներս մտնել միայն երկրորդ խաղակեսում։
«Մելիքբեկյանը և իր համակիրները պետք է հասկանան` հնարավոր չէ մշտապես թաքնվել հայկական ֆուտբոլի ողբալի իրականությունից և իրենց նույնականացնել հայկական ֆուտբոլի հետ։ Ֆուտբոլն, առաջին հերթին, երկրպագուներինն է, չկա ֆուտբոլ առանց երկրպագուների։ Մի խումբ անարդյունավետ կառավարիչների պատճառով չպետք է երկրպագուն զրկվի ազգային հավաքականների կողքին լինելու հնարավորությունից»,- նշել են նրանք։
UEFA-ի Ազգերի լիգայի Հյուսիսային Մակեդոնիայի հետ խաղում Հայաստանի հավաքականի պարտությունից հետո, որին հաջորդել էր հավաքականի գլխավոր մարզիչ Ալեքսանդր Պետրակովի պաշտոնանկությունը, ֆան-շարժումների ներկայացուցիչները պահանջել էին Մելիքբեկյանի հրաժարականը: ՀՖՖ-ն հոկտեմբերի 14-ին հայտարարել էր, որ ՀՖՖ նախագահի հրաժարականի հարց չի քննարկվում: Ինքը՝ Մելիքբեկյանը, հոկտեմբերի 21-ին հայտարարել էր, որ չի պատրաստվում հրաժարական տալ։
«Փյունիկ» ֆուտբոլային ակումբը հոկտեմբերի 31-ին միացել էր երկրպագուների՝ ՀՖՖ նախագահի հրաժարականի պահանջին: Նոյեմբերի 1-ին «Ուրարտու» ակումբը ՀՖՖ-ին մեղադրել էր անարդյունավետության մեջ և միացել Հայաստանի ազգային հավաքականի և Պրեմիեր լիգայի ֆան ակումբների՝ ՀՖՖ ղեկավարությանը պաշտոնանկ անելու պահանջին: Նոյեմբերի 1-ին «Նոա» և «Ուրարտու» ակումբների հանդիպման ժամանակ երկրպագուները բողոքի ակցիա էին անցկացրել Մելիքբեկյանի հրաժարականի պահանջով:
Տասնյակ երկրպագուներ ընդհատել էին Հայաստանի Պրեմիեր լիգայի հանդիպումը՝ ճայթուկներով դուրս վազելով խաղադաշտ: Նրանք բացել էին «քո ժամանակը եկել է» գրությամբ պաստառը և բղավել՝ «հեռացիր»։ Ավելի ուշ խաղը վերսկսվել էր։ «Նոան» երկխոսության կոչ էր արել ֆուտբոլի ֆեդերացիային և Մելիքբեկյանի հրաժարականը պահանջող ակումբներին:
Ֆուտբոլի եվրոպական ասոցացիան՝ UEFA-ն (Union of European Football Association), Հայաստանի ֆուտբոլի ֆեդերացիայի (ՀՖՖ) նկատմամբ երկու տուգանք էր սահմանել՝ 17,5 հազար եվրո երկրպագուների կողմից փակցված վիրավորական դրոշի և 20 հազար եվրո՝ տրիբունայում ճայթուկների օգտագործման համար։
