Հունվարի 11-ին վարչապետ Նիկոլ Փաշինյանը պատարագի է մասնակցել Մասիսի Սուրբ Թադեոս եկեղեցում, որին ներկա է գտնվել Մասսյացոտնի թեմի առաջնորդի պաշտոնից ազատված Գևորգ եպիսկոպոս Սարոյանը։
Փաշինյանի մասնակցությամբ պատարագին ներկա էին նաև կառավարության մի շարք անդամներ։
Զուգահեռ՝ Արարատի Սուրբ Հակոբ եկեղեցում տեղի ունեցած պատարագին հոգեշնորհ Տեր Ռուբեն վարդապետ Զարգարյանը հայտարարել է, որ որոշել է ընդունել Ամենայն Հայոց կաթողիկոս Գարեգին 2-րդի առաջարկը՝ գլխավորելու Մասսյացոտնի թեմը։
«Այս փոթորկուն շրջանում մեր եկեղեցու կյանքում, երբ պառակտված է մեր եկեղեցին, ներսից՝ դրվեց այս ընտրությունը մեր սիրելի հայրապետի և թեմի քահանայաց դասի մեծամասնության կողմից, ինձ մնում էր ընտրել։ Չէի կարող չընտրել, այո չասել, որովհետև իմ յոթամյա կամ տասնամյա վարդապետական գործությունեությունը կզրոյացվեր։ Որոշել եմ ընդունել առաջարկը՝ գալ Մասսյացոտնի թեմ՝ ծառայելու, հոգևոր-եկեղեցական գործունեություն իրականացնելու՝ առանց ինտրիգների, պառակտումների, ատելության և բանսարկությունների»,- նշել է նա։
Միևնույն ժամանակ՝ պաշտոնանկ եպիսկոպոս Սարոյանը, որն ավելի վաղ միացել էր Գարեգին 2-րդի հրաժարականի պահանջին, լրագրողներին ասել է, որ ոտնձգություն է համարում հոգևորականների ներգրավվածությունը քաղաքականությանը։
«Ժողովուրդն ում ընտրում է, մենք պարտավոր ենք ընդունել նրան՝ որպես պետությունը ներկայացնողներ»,- ասել է նա։
Սարոյանը նաև հայտարարել է, թե Արշակ արքեպիսկոպոս Խաչատրյանին վերագրվող նյութերը կաթողիկոսի հրահանգով են հրապարակվել։
«Եթե կաթողիկոսը չէր ցանկանում, որ 10 եպիսկոպոսները բողոքի ձայն բարձրացնեին, թող չհրապարակեր Արշակ արքեպիսկոպոսի վերաբերյալ նյութերը»,- նշել է նա։
Սարոյանը նաև հայտարարել է, որ «կաթողիկոսը կոմպրոմատներ ունի հոգևորականների դեմ»։ Նա «հայրենադավ» է անվանել բոլոր նրանց, ովքեր 10 եպիսկոպոսներին «տիրադավ» են անվանում։
Փաշինյանն ամիսներ է՝ պահանջում է կաթողիկոսի հրաժարականը՝ հայտարարելով, որ նա զավակ ունի և խախտել է կուսակրոնության ուխտը։ Վարչապետն այս փուլում մասնակցում է պատարագների, որոնց ժամանակ զեղչվում է կաթողիկոսի անունը։ Փաշինյանի հետ հանդիպումից հետո 10 հոգևորական կոչ էին արել կաթողիկոսին «հանգստյան կոչվել» և նոր ընտրություններ կազմակերպել։
Հունվարի 10-ին Մասյացոտնի թեմի առաջնորդը կաթողիկոսի հրամանով ազատվել էր թեմակալ առաջնորդի պաշտոնից, տեղապահ էր նշանակվել Զարգարյանը։ Փաշինյանն առոչինչ էր անվանել Մասյացոտնի թեմի առաջնորդի վերաբերյալ կաթողիկոսի որոշումը։
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
Ինձ վերագրվող տեսանյութերը կեղծիք են և սուտ․ Արշակ արքեպիսկոպոս
Փաշինյանի այցը Գյումրի․ զուգահեռ պատարագներ և ակցիա՝ ի նշան բողոքի
