Արտակ Բեգլարյանն ԱՄՆ Կոնգրեսին կոչ է արել պատժամիջոցներ սահմանել Բաքվի նկատմամբ և դադարեցնել ռազմական օգնությունը

Արցախի նախկին պետնախարար, Մարդու իրավունքների նախկին պաշտպան Արտակ Բեգլարյանն ԱՄՆ Կոնգրեսին կոչ է արել պատժամիջոցներ կիրառել Ադրբեջանի նկատմամբ և ճնշում գործադրել Բաքվի վրա՝ Արցախ վերադարձն ապահովելու համար:

Ելույթ ունենալով ԱՄՆ Կոնգրեսի Մարդու իրավունքների հարցերով Թոմ Լանտոսի հանձնաժողովի նիստում՝ Բեգլարյանն ընդգծել է, որ երեք տարվա ընթացքում Ադրբեջանը լիարժեք ցեղասպանություն է իրականացրել արցախահայության դեմ: Նա նշել է, որ 2023 թվականի սեպտեմբերին ավելի քան 150 հազար հայ բռնի տեղահանվել է տարածաշրջանից և զրկվել հայրենիք վերադառնալու որևէ հնարավորությունից։

Բեգլարյանը հայտնել է, որ ներկայումս պաշտոնապես հաստատված առնվազն 23 հայ պատանդ է պահվում Ադրբեջանում և ենթարկվում խոշտանգումների, նրանց նկատմամբ կայացվում են ապօրինի դատավճիռներ: Նրա տվյալներով՝ 2020-23 թվականներին Արցախում անհետ կորել է ավելի քան 200 մարդ, տեղի է ունեցել նաև բռնի անհետացման ավելի քան 80 դեպք։ Բեգլարյանը հավելել է, որ Բաքուն այդ մարդկանց ճակատագրի մասին որևէ տեղեկություն չի տրամադրել։

Արցախի նախկին պետնախարարը նշել է նաև Ադրբեջանի կողմից հայկական և քրիստոնեական մշակութային և կրոնական ժառանգության ավելի քան 6000 հուշարձանի ոչնչացման, պղծման և վտանգնված լինելու մասին։

Բեգլարյանի խոսքով՝ միջազգային կազմակերպությունները, ինչպիսիք են Freedom House-ը և Ցեղասպանագետների միջազգային ասոցիացիան, Արցախում տեղի ունեցող իրադարձությունները գնահատում են որպես էթնիկ զտում և ցեղասպանություն: Բեգլարյանն ընդգծել է, որ Բաքուն արգելափակում է բոլոր տեսակի միջազգային մուտքերը, հայ բնակչության մուտքը տարածաշրջան, ինչպես նաև ցույց է տալիս Արցախում հայկական ներկայությունն ամբողջությամբ ոչնչացնելու մտադրությունը:

Նա ընդգծել է, որ Ադրբեջանի նախագահը նաև սպառնում է նոր ագրեսիայով Հայաստանի ինքնիշխան տարածքի նկատմամբ։ Կոնգրեսին կոչ է արել պաշտոնապես ճանաչել Արցախի ժողովրդի ցեղասպանությունը որպես Հայոց ցեղասպանության շարունակություն, ինչպես նաև աջակցել Արցախի ժողովրդի դեմ զանգվածային վայրագությունների համար պատասխանատու բոլոր անձանց նկատմամբ միջազգային և ազգային ցանկացած հետաքննության և դատական հետապնդման:

Նախկին օմբուդսմենը կոչ է արել նախաձեռնել կամ աջակցել Արցախ միջազգային դիտորդական առաքելության ուղարկմանը՝ հայկական մշակութային ժառանգության և սեփականության հետ կապված իրավիճակը փաստագրելու, ինչպես նաև հայերի անվտանգ, արժանապատիվ և կայուն հայրենիք վերադարձի պայմանները գնահատելու նպատակով:

Բացի այդ, նա հորդորել է ուժեղացնել դիվանագիտական ճնշումն Ադրբեջանի վրա՝ ապահովելու համար նրա կողմից ՄԱԿ-ի Միջազգային դատարանի որոշումների կատարումը, ինչպես նաև ապահովելու հայ բնակչության վերադարձն Արցախ՝ պաշտպանության միջազգային հուսալի մեխանիզմով:

Բեգլարյանն ապրիլի 25-27-ն ԱՄՆ Յեյլի համալսարանում տեղի ունեցած միջոցառումների ընթացքում Արցախի վերաբերյալ 7 ռազմավարական նպատակ էր հրապարակել։