Արցախի մարդու իրավունքների պաշտպան Գեղամ Ստեփանյանն արձագանքել է ՀՀ Ազգային ժողովի նախագահ Ալեն Սիմոնյանի այն հայտարարությանը, որ պետք էր մնալ Արցախում և կռվել։
«Ի պատասխան ԱԺ նախագահի՝ կարելի է բերել բազմաթիվ փաստեր, պայքարի և անձնազոհության բազմաթիվ դրվագներ, բայց այդ ամենն անիմաստ է, երբ գործ ունենք տիեզերական մակարդակի անբարոյականության, ստորության և ցինիզմի հետ»,- գրել է Ստեփանյանը։
Նա հիշեցրել է, որ երբ Ֆրիդոմ Հաուսը ներկայացնում էր Արցախում էթնիկ զտման մասին անգլալեզու զեկույցը՝ փաստագրելով ադրբեջանական հանցագործությունները, քննարկման ժամանակ ինքը հարց է տվել, թե ի՞նչ կարելի է անել, որ զեկույցը հասանելի լինի նաև հայ հանրությանը, որպեսզի մարդիկ ծանոթանան Արցախում կատարվածին և, ի վերջո, վերանա այն անիմաստ հարցերի շարանը, թե ինչո՞ւ չկռվեցիք, կարելի էր մնալ ու պայքարել և այլն:
«Երևի միամտություն էր կարծել, թե զեկույցը կամ բազմաթիվ այլ փաստագրող նյութեր կարող են որևէ բան փոխել, քանի որ ատելության խոսք գեներացնող այդ թեզերը հրապարակ են նետվում քաղաքական իշխանության և նրանց սպասարկող լրատվամիջոցների կողմից, և դրա դեմ պայքարը ենթադրում է պայքար՝ պետական քարոզչամեքենայի դեմ»,- շեշտել է Արցախի ՄԻՊ-ը։
Այսօր Սիմոնյանը, պատասխանելով Արցախ վերադարձի մասին արցախցի լրագրողի հարցին, ասել էր, որ «պետք էր կռվել»։
«Պատասխանում եմ՝ կարվի ամեն բան, որ դուք վերադառնաք այն ժամանակ, երբ այնտեղ անվտանգ կլինեք, որովհետև դուրս եկաք, որովհետև անվտանգ չէր, չնայած կարելի էր մնալ և պայքարել մինչև վերջ, բայց դուք դուրս եկաք»,- ասել է Սիմոնյանը։
2023 թվականի սեպտեմբերի 19-ին Ադրբեջանը հարձակվել էր Արցախի վրա։ Ռազմական գործողությունների ավարտից հետո Արցախի ամբողջ բնակչությունը բռնատեղահանվել էր։ Արցախից բռնի տեղահանված 100 632 քաղաքացի էր հասել ՀՀ։ 2023թ. հոկտեմբերի 26-ին ՀՀ կառավարությունն ընդունել էր որոշում Արցախից բռնի տեղահանված բնակիչներին ժամանակավոր պաշտպանության տակ վերցնելու մասին, որով օրենքի ուժով նրանք դառնում են փախստական:
Ադրբեջանի ռազմական ագրեսիայի հետևանքով, ՀՀ ՔԿ-ի վերջին տվյալներով, զոհվել էր ավելի քան 200, վիրավորվել՝ ավելի քան 300 մարդ, գերեվարվել՝ 16-ը, խոշտանգվել՝ 14-ը, անհետ կորել՝ 42-ը։ Սեպտեմբերի 25-ին Ստեփանակերտի մոտ գտնվող բենզինի պահեստի պայթյունի հետևանքով կա 218 զոհ, 21 անհետ կորած, 3 չնույնականացված դի և 120 վիրավոր։
