Դատավճիռն իրավաբանորեն անհիմն է, հայտարարել է Արցախի նախկին պետնախարար Ռուբեն Վարդանյանի իրավաբանական թիմը՝ անդրադառնալով Բաքվի «դատարանի» վճռին։
«Այս վճիռն անկախ և անաչառ դատական գործընթացի արդյունք չէ, այլ քաղաքական նկատառումներով պայմանավորված վարույթի կանխատեսելի հետևանք՝ ամբողջությամբ անհամատեղելի արդար դատաքննության երաշխիքների հետ»,- ասվում է պաշտպանների հայտարարության մեջ։
Իրավաբանական թիմը շեշտել է, որ դատավարությունն ի սկզբանե ընթացել է և՛ Ադրբեջանի ներքին օրենսդրության, և՛ այդ երկրի միջազգային պարտավորությունների լուրջ և համակարգային խախտումներով: Դատարանը չի բավարարել Քաղաքացիական և քաղաքական իրավունքների միջազգային դաշնագրով և Մարդու իրավունքների եվրոպական կոնվենցիայով երաշխավորված անկախության և անկողմնակալության պահանջներին: Մեղադրանքների ձևակերպումը և էությունը խաթարել են անմեղության կանխավարկածը։
Նշվում է, որ պաշտպանական կողմը զրկված էր գործի նյութերին պատշաճ ծանոթանալու հնարավորությունից՝ ունենալով խիստ անբավարար ժամանակ նյութերի ուսումնասիրման համար։
«Պարոն Վարդանյանին չի տրամադրվել իր կողմից ընտրված փաստաբանի հետ լիարժեք աշխատելու հնարավորություն։ Սրանք ընթացակարգային խախտումներ չեն և ուղղակիորեն զրկել են Վարդանյանին արդյունավետ պաշտպանություն իրակականացնելու հիմնարար իրավունքից»,- նշել են նրանք։
Պաշտպաններն ընդգծել են, որ չի գործել նաև դատավարության կողմերի հավասարության սկզբունքը․ Վարդանյանին չի տրվել իրեն առաջադրված մեղադրանքներն իրավասու, անկախ ու անաչառ դատարանում վիճարկելու իրական հնարավորություն:
Նրանք նաև շեշտել են, որ Վարդանյանը քրեական պատասխանատվության է ենթարկվել ոչ թե ապացուցված անհատական արարքների, այլ Արցախի/Լեռնային Ղարաբաղի ինստիտուտների հետ քաղաքական ներգրավվածության ու հանրային ծառայության համար:
«Նրա դատապարտումն արտահայտում է Լեռնային Ղարաբաղի էթնիկ հայերի նկատմամբ իրականացվող քաղաքականության օրինաչափությունը և խորը մտահոգություններ է առաջ բերում իրավունքի գերակայության վերաբերյալ։ Հետևաբար, այս դատավարությունը ևս, ինչպես մյուս տասնհինգ հայերի նկատմամբ վերջերս ավարտված դատավարությունը, ապօրինի է»,- հավելել են պաշտպանները:
Իրավաբանական թիմը կոչ է արել միջազգային կազմակերպություններին, մարդու իրավունքների պաշտպանության մեխանիզմներին և պատասխանատու կառավարություններին` անհապաղ և կոնկրետ քայլեր ձեռնարկել Վարդանյանի և Բաքվում պահվող և ապօրինի դատապարտված մյուս հայերի իրավունքները պաշտպանելու և նրանց ազատ արձակումն ապահովելու համար:
Այսօր ավելի վաղ Բաքվի «դատարանն» Արցախի նախկին պետնախարար Վարդանյանին դատապարտել էր 20 տարվա ազատազրկման։ Նա 10 տարի կանցկացնի բանտում, ևս 10 տարի՝ խիստ ռեժիմի բանտում: Վարդանյանի ընտանիքն Ադրբեջանի ռազմական դատարանի վճիռը որակել էր սարսափեցնող, թեև՝ ոչ անսպասելի։
Իր եզրափակիչ խոսքում Վարդանյանը նշել էր, որ չի վախենում հնարավոր դատավճռից և ստեղծված իրավիճակը համարում է «դատավարություն», որը չի նպաստում երկարատև խաղաղության ձևավորմանը։ Նրա, ինչպես նաև մյուս հայ գերիների դատավարությունն ընթացել էր անկախ իրավապաշտպանների ու լրատվամիջոցների բացակայության պայմաններում:
15 տարվանից մինչև ցմահ ազատազրկման էին դատապարտվել նաև Արցախի մյուս ղեկավարներն ու այլ գերիներ: Ադրբեջանի նախագահ Իլհամ Ալիևը բացառել էր Բաքվում բանտարկված Արցախի առաջնորդների ազատ արձակման հնարավորությունը։
